- Publika iha: 15 Dezembro 2015
Officer Imunizasaun Organizasaun Saude Mundial (OMS), Mateus Cunha, hateten Timor –Leste hala’o ona vasinasaun ba labarik sira hodi prevene moras sia (9).
Nia dehan, moras sia ne’e mak hanesan moras Tuberculosis, Diphtheria, Pertussis, Tetanus, Poliomyelitis, Sarampu, Hepatitis, Haemohilus influenza no Rubella bele prevene liu husi vasinasaun kompletu.
“Moras ida ne’e perigu bele hamate labarik, entaun governu halo kampanha vasinasaun hasa’e imunidade labarik sira nian atu prevene moras hirak ne’e,” Officer Cunha hateten, iha Timor Plaza, Dili.
Nia hatutan, moras sira ne’e perigu tebes tanba bele fo ameasa ba labarik sira nia vida, tanba ne’e tenke halo vizilansia ba epidemologia ba moras hirak ne’e.
Nia hatutan, vasinasaun importante tebes atu protese labarik sira husi moras oi-oin no bele proteje mos komunidade sira seluk husi risku moras sira ne’e.
Dadus Organizasaun Saude Mundial (OMS) hatudu labarik 2,4 Miliaun iha mundu kada tinan mate, tanba kauza husi sarampu no labarik 15000-60.000 mak matan delek impaktu husi sarampu mos.
Iha parte seluk Administrador Postu Administrative Dom Aleixo, Berta Santa Gonsalves Veira, hateten komunidade barak falta konesementu kona ba importansia husi imunizasaun tanba ne’e komunidade barak mak la lori oan ba hetan imunizasaun.
“Ami servisu hamutuk ho sira saude atu fo esplikasaun ba ita nia komunidades ne’ebe falta konesementu kona ba importansia husi imunizasaun ba labarik sira,” nia hateten.
Nia hatutan iha kampania imunizasaun ne’ebe ministerio saude lansa iha fulan Julho labarik barak mak seidauk hetan imunizasaun tanba inan aman falta informasaun kona ba importansia husi imunizasaun.
Dadus Ministerio Saude kona ba kampania nasional ba imunizasaun ne’ebe lansa iha fulan Julho to’o Agostu hatudu labarik 95% mak hetan ona imunizasaun prevensaun moras Rubella, Sarampu, Polio no seluk tan.