- Publika iha: 02 Dezembro 2015
Membru Parlamentu (MP) Nasional, Deputado Virgilio da Costa Hornai, sujere ba Ministerio Saude (MS) no Sekretario Estado Apoiu Sosio Ekonomia da Mulher (SEM) atu dezenvolve atividades demonstrasaun tein aihan iha komunidade nia leet.
Nia dehan, ho atividade ne’e bele informa no eduka inan feto sira hodi prepara aihan ne’ebe iha nutrisaun ba familia liu –liu labarik ki’ik sira, tanba problema malnutrisaun iha Timor –Leste as kauza husi ekonomia familia fraku no konesementu komunidade nian ba valor nutrisaun minimu.
“Tenke organiza kampanha tein hahan ho diversidade iha komunidade nia leet, hanesan parte ida sosializa komunidade liu –liu inan feto sira atu prepara aihan ne’ebe nutritive ba familia,” Deputado Hornai sujere, iha Parlamentu Nasional.
Nia hatutan, problema malnutrisaun iha Timor-Leste as kauza husi ekonomia familia fraku no konesementu sosiedade nian kona ba valor nutrisaun husi aihan local sira ne’ebe agrikultores produs minimu tebes.
“Ita nia rai iha aifuan oi-oin, maibe ita la konsidera aifuan sira ne’e hanesan vitamina ida ba ita nia isin,” nia hateten.
Iha parte seluk Diretor Nasional Saude Publika Ministerio Saude, Carlito Freitas, hateten atividades tein aihan local durante ne’e implementa ona liu husi programa Servisu Integradu Saude Comunitaria (SISCA), maibe tinan ida ne’e iha problema oituan.
“Uluk Banku Mundial mak apoia, maibe agora laiha ona, entaun tenke kontinua ho orsamentu jeral do estado, ami sei esforsu atu bele kontinua halo kampanha demostrasaun tein,” nia hateten.
Nia hatutan, apoiu Banku Mundial ba programa SISCA remata iha fulan Junho tinan 2015, ba oin depende ba orsamentu jeral do estado hodi kontinua programa no atividade sira ne’e.