- Publika iha: 26 Março 2012
Organizasaun Non Governmentais (ONG) Psycosial Recovery Development East Timor (PRADET) rekomenda ba governu liu husi Ministeriu Saude (MS) atu estabelese Sentru Rehabilitasaun ba ema sira ne’ebe uza alkoh ka droga iha nasaun ne’e.
Diretora PRADET, Luiza Marcal hateten maske numeru ema uza droga sei kiik maibe presiza foti kedas nune’e bele prevene no bele rehabilita drogadu sira tanba fo impaktu ba dezenvolvementu nasaun nian.
“Hanoin ida ne’e la’os mosu husi PRADET deit maibe husi komunidade ne’ebe durante ne’e ami fahe informasaun mos rekomenda ba governu liu husi Ministerio Saúde atu hare to’ok Sentru Rehabilitasaun ida ba ema drogadu sira, no importante tebes hodi fo prevensaun ne’ebe diak ba sira atu labele fo impaktu ba dezenvolvimentu nasaun nian,” dehan Luisa M. de Jesus, semana kotuk (19/03) iha Bidau, Dili.
Diretora Marcal dehan, durante ne’e sira fo ona asistensia ba ema moras mental sira inklui mos halo programa kona ba prevensaun droga ka alcohol e sira mos halo ona sosializasaun konaba impaktu husi uzu alkoh ka droga ne’ebe ladiak.
Iha parte seluk Diretor Servisu Investigasaun Criminal (SIC), Superintendente Calistro Gonzaga hateten hare husi esperensia husi nasaun seluk ne’ebe dezenvolvidu, hanesan nasaun Indonezia ne’ebe iha Bandang Nasional Narkotika (sentru narkotika).
Tuir Diretor Gonzaga, la’os foti deit aksaun penal maibe mos prepara fatin atu halo rehabilitasaun bainhira konsumedores sira sai husi pena prizaun ou bele hetan deit sansaun rehabilitasaun.
“Hau hanoin Timor –Leste nudar nasaun foun ida presiza tebes atu kria fatin rehabilitasaun propriu ba ema ne’ebe uza droga maske iha Timor-Leste sei iha kazu ne’ebe ki’ik maibe presiza duni hanoin ba oin,” Diretor Gonzaga fo apoia.
Nia hatutan Polisia nia divisaun mak atu alina prosesu administrative, pesoal ne’ebe kontra lei droga nian maibe atu tau matan no halo rehabilitasaun, rekopera fali drogadu sira nia kondisaun ne’e kompetensia governu nian liu husi MS.