Quarta, Fevereiro 19, 2025

Tuir Diretor SIC, Superintendente Calistro Gonzaga katak alkohol ka droga estraga ema nia mentalidade, husi diak sai ba aat.Diretor Servisu Investigasaun Criminal (SIC) Superintendente Calistro Gonzaga hateten alcohol ka droga bele estraga ema nia mentalidade bainhira uza liu standar ne’ebe iha.

“Bainhira ema ida uza ka hemu alcohol ka droga automatikamente ema ne’e iha mudansa kedas ba sira nia hahalok, nia bele sai bulak, bele oho ema, bele la’o molik no sira nia hahalok lahanesan ho ema normal,” hateten Diretor Superintendente Gonzaga semana kotuk (06/03) iha Hotel Timor, Dili.

Tuir Diretor Gonzaga, aimoruk ka droga iha tipu oi-oin deit hanesan putaw, ganja, ampohetamine, ecstasy, kokain, hheroin,sabu-sabu no seluk tan maibe entre sira ne’e , so putaw mak perigu liu ba ema nia saude no mentalidade.
“Kuandu ema ida hemu sala ida ne’e, maka ema ne’e iha nia hanoin ne’e mesak buat furak deit no saida mak nia hakarak halo tenke halo duni, halo nia matan laran mean hotu no nia sei la tur hakmatek iha nia fatin,” Diretor ne’e dehan.
Diretor Gonzaga afirma, impaktu husi uza droga ka alcohol mak bele halo ema sai alezadu, no estraga ema nia isin lolon.

“Uluk nia ema ne’ebe bonito ka bonita los, maiibe depois de uza ida ne ’e halo sira nia isin ka oin aat los mosu hanesan visur iha sira nia oin, bele halo  matan aat, hanoin no seluk tan,”  Diretor SIC Gonzaga esplika.

Relasaun ho alkoh ka droga ne’ebe rezulta ema sai bulak, no oinsa mak atu atende ema sira ne’e, tuir Xefe Departementu Saude Mental, Teofilo Julio Kehic Tilman katak governu kria kondisaun tomak atu fo asistensia ba ema sira ne’e.
“Ami fo aimoruk ba sira hanesan mos ba ema bulak nian, maibe ami mos halo aproximasaun ba sira nia familia atu oinsa mak sir abele tau matan ba nia,” hateten Xefe Tilman.

Tuir Xefe Tilman, importante hakbesik ba familia tanba ema hirak ne’e balu uza droga ka alkoh tanba stress no iha fator barak.

“balu tanba putus cinta, ekonomia no seluk-seluk tan, tratamentu ne’ebe ami fo sira hanesan mos tratamentu ba ema bulak sira ne’ebe ami durante ne’e ami fo,” Nia reforsa.