- Publika iha: 26 Março 2012
Tuir Diretor Saude Distritu Baucau, Gelasio da Costa Soares hateten fatin dormitoriu (eis ospital Ria Mari Baucau) ba estudante Medisina iha Distritu Baucau oras ne’e iha hela prosesu rehabilitasaun nia laran.
Diretor Saude Soares hato’o kestaun ne’e relasiona ho estudante medisina ne’ebe halo estajiiu iha Distritu ne’e, durante laiha fatin atu toba.
“Fatin iha maibe nia rehabilitasaun mak atraza, nia pursentu to’o ona 80, pursentu 20 ne’e mak tenki tinta parede sira ne’ebe tuan,” informa Diretor Soares, semana kotuk iha Baucau.
Diretor ne’e haktuir, rehabilitasaun atinji ona 80%, falta toilet, odamatan, vintunha e kompania mos sei tau kama, kulsaun, kadeira inklui pinta foun fali didin sira ne’ebe tuan ona.
Tuir Diretor Soares, durante ne’e estudante medisina sira ne’ebe estajiu iha Distritu ne’e, balun hela iha sira nia familia, balun aluga uma no balun mos hela duni iha sira nia uma rasik.
Tanba ne’e, nia parte husu ba Kompania ne’ebe kaer projetu ne’e atu aselera lalais prosesu rehabilitasaun, nune’e estudante sira ne’e bele hela no aulas iiha fatin ne’e.
Iha parte seluk Administrador Distritu Baucau, Antonio Agostu Soares hateten Governu lokal la’os la prepara fatin estudante medisina sira ne’e, maibe prosesu rehabilitasaun mak hotu tarde.
“Dala ruma iha obstaklu, iha dezafio ita infrenta, ita bele hanoin buat hotu-hotu diak,” Administrador Soares tenik.
Tuir Administrador, oras ne’e dadaun estudante medisina sira ne’e hela provizoriumente iha eis Asrama SPK (Sekolah Pendidikan Kesehatan).