Quarta, Fevereiro 19, 2025

Kompleta tinan lima ona ejistensia Mari’e Stope’s Internasional iha Timor-Leste no konsege ona fo asistensia ba komunidade sira iha Distritu hitu.Tinan lima ona Klinika Mari’e Stope’s Internasional (MSI) ezisti iha Tiimor-Leste no konsege hala’o programa oferese informasaun kona ba planeamentu familia, saude maternal, saude sexual ba joventude sira no fo asistensia ba komunidade sira iha Distritu walu.

“Ami hare espesifiku liu iha area saúde repruduktiva no sexual, agora dadaun ami nia membrus sira hamutuk na’in 80 hala’o ona programa edukasaun no fo ona atendementu iha distritu walu liu –liu ba ema kiak sira iha area rurais no mos iha sidade,” hateten Diretora MSI, Mary Larkin, semana kotuk (01/03) iha selebrasaun aniversariu Klinika MSI ba da-lima nian iha TL, iha Vila Verde Dili.

Tuir Diretora Larkin, Distritu hirak ne’ebe sira nia ekipa haleu ona alende Dili mak hanesan Distritu Lospalos, Viqueque, Baucau, Ainaro, Same, Ermera, no Distritu Bobonaro.
Diretora ne’e hatutan, MSI servisu hamutuk ho Ministeriu Saude (MS)  hala’o programa Servisu Integradu Saude Komunitaria (SISCA) iha area rurais sira.

Diretora Larkin hatutan, durante tinan lima loke Klinika Espesialista kona ba Saúde Reproduktiva iha TL no fo ona asistensia ba ema na’in rihun 80 (80.000) no ema rihun 150 (150.000) mak tuir ona formasaun kona ba saúde sexual no reproduktiva husi ekipa MSI.

Ho susesu ne’ebe iha, MSI hato’o agradese ba parseirus sira nia kontribuisaun tanba laiha parseiru, sira labele atinji objetivu sira ne’e.
“Espera katak kolaborasaun servisu ne’ebe ami no ami nia parseirus sira hala’o iha tinan lima oin mai bele fo benefisiu ba komunidade sira, liu-liu ba feto sira nia futuru  iha Timor-Leste,” nia esperansa.

Iha lidun seluk Reprezentante Xefi Suku Vila Verde, Feliciana Iria Soares fo parabens ba MSI ne’ebe durante ne’e fo ona kontribuisaun ba dezenvolvimentu nasaun nian iha setor saúde nian. 

“Hau lori Xefi Suku nia naran ho komunidade tomak iha suku Vila Verde fo parabens no prontu fo suporta ba servisu Mari’e Stope’s nia servisu atu nune’e bele hasa’e kapasidade no konesementu ba joventude no komunidade kona ba atu hases an husi moras ne’ebe hada’et liu husi relasaun sexual iha suku ida ne’e,” Soares dehan.

Iha oportunidade hanesan Kliente Belmira Fernanda Soares hateten  atendimentu pesoal saude iha Klinika MSI kapas tebes tanba parteira no doutor sira iha kapasidade ne’ebe masimu tebes atu fo asistensia.

“Espera katak ho selebrasaun tinan lima ne’e MSITL bele servisu ho profesionalismu liu tan,” nia esperansa.
“Hau sai kliente ba Klinika MSITL tanba durante tinan lima ona hau mai beibeik halo konsulta iha ne’e tanba parteira no doutora sira iha ne’e fo asistensia kapas los,” dehan Soares.