- Publika iha: 16 Março 2012
“Bainhira ami komisaun F hala’o enkontru ho Ministru Saúde sira promete katak pagamentu rezime kareira sei selu ona ba prosesionais saúde nian iha fulan Março maibe rona fali informasaun sira atraza fali ne’e ami preokupa tanba tinan mandatu ikus ona no iha fulan ikus ona entau difisil atu rezolve,” preokupa Deputada Ilda Maria da Conceição, semana kotuk (28/02) iha Parlamentu Nasional.
Tuir Deputada ne’e katak, ho atrazamenntu halo pesoal saúde sira diskontente no ida ne’e bele empede servisu atendementu hodi fo asistensia ba pasiente sira ne’ebe aumenta ba bebeik.
Hatan ba kestaun ne’e, Diretor Jeral Ministerio Saúde (MS), Agapito da Silva Soares, hateten mandatu governu ida ne’e laiha relasaun ho administrasaun publika katak mandatu bele remata maibe motor estadu kontinua la’o tanba lei iha tiha ona e governu foun uza nafatin lei ne’ebe aprova ona sei laiha impaktu ba pagamentu ne’e.
“Ministerio saúde laiha inisiativa ida atu atrava orsamentu pagamentu ba pesoal saúde sira no laiha hanoin ida la implementa tanba ne’e servisu ministeriu nian atu dignifika servisu pesoal saúde sira nian nune’e bele fo benefisiu mos ba povu,” Diretor Soares hatan.
Nia hatutan katak prosesu pagamentu ne’e kleur tanba ema hotu kestiona no hakarak ho montante bo’ot maibe nunka hasoru malu entau atu prevene problema presiza preparasaun ne’ebe diak atu identifika lolos se mak bele hetan rezime especial ida ne’e tanba pesoal saúde barak.
Nia dehan, prosesu rekolha dadus mos la’os fasil maibe sira konsege rekolha hotu ona no agora iha ona prosesu inkuadramentu.
“Ami halo espektativa katak molok fulan Junho prosesu pagamentu ba pesoal saúde sira ita implementa tanba ne’e atu implementa iha fulan saida deit depende ba lei mak deside. Sira espera katak ho apoiu ne’ebe governu fo bele fo benefisiu ba povu entau presiza preparasaun ne’ebe diak,” nia informa.