- Publika iha: 15 Março 2012
Atu responde preokupasaun husi komunidade sira nian kona ba atendementu pesoal saude sira iha Sentru Saude sira iha teritoriu tomak, Ministeriu Saude (MS) iha ona planu atu fo bolsu estudus ba estudante nain 80 atu hasai Diploma 3 iha area parteira no enfermajen nian iha Sekolah Tinggi Ilmu Kesehatan (STIKES) Kupang iha tinan ne’e.
“Foin dadauk exelensia Sr. Ministru ba halo seminario iha Kupang hare katak situasaun iha Kupang mos diak, sira nia Institutu Sekolah Tinggi Ilmu Kesehatan atu bele tampung mos ita nia ema maibe ida ne’e sei iha planu se ida ne’e mak realize duni ami sei haruka estudante
hamutuk 80,” hateten Xefe Departementu Dezenvolvimentu Professional Saude, Duarte Marcal de Araujo, semana kotuk (20/02) iha nia knar fatin Kaikoli Dili.
Xefe de Araujo hatutan, agora dadaun alende asina momerandu ida entre governu Timor-leste (Ministeriu Saude) no Institutu, Pesoal Saude no Departamentu Dezenvolvimentu koko atu halo lobi ho Institutu atu bele hatene klaru kona ba total orsamentu ne’ebe sei hasai durante tinan ida nia laran.
“Razaun Senhor Ministru hili STIKES Kupang, tanba Kupang rai ne’ebe ladun sidade, atu prevene akontesementu ida hanesan iha Java Leste no estudante barak mak mai husi Distritu entau sira ladun hatene dezenvolvimentu iha nasaun ne’ebe sidade liu,” nia esplika.
Nia afirma, bolsu estudu ne’e sei loke ba estudantes ne’ebe remata Eskola Sekundaria iha Siensia Naturais nian (jurusan IPA) ne’ebe hakarak atu kontinua estudu iha area saude maibe tenke ho idade 25 anos inklui mos sira ne’ebe kaben nain ona tanba sira mos iha direitu atu kompete.
Tuir de Araujo, tinan kotuk iha Parteira Timoroan na’in neen mak hala’o estudu iha STIKES no sira nia kunesementu no kapasidade mos masimu atu fo asistensia ba povu Timor tomak maibe presiza mos hatene institutu nia kurikulum no kualidade dosente, inklui fasilidade ne’ebe sira iha.
Entretantu Vice Presidente Komisaun F Parlamentar, Deputadu Francisco M. da Costa Jeronimo preokupa ho planu ne’e tanba Timor-Leste iha ona kursu ba Parteira no Emfermajen Diploma 3 e la presiza atu haruka tan ba eskola iha liur.
“Ami komisaun F nia hanoin mak reforsa uluk ita nia sistema no kondisaun iha Timor katak ita iha kursu ba Parteira no Emfermajen ida ne’e mak ita uza la’os ba fali iha liur, se ba iha liur ne’e kursu ne’ebe ita laiha hanesan mestrado ne’e ami konkorda 100 persen, Analisa Laboratorio ne’e iha Timor seidauk iha bele haruka ba,” nia dehan.
Nia dehan labele gasta osan atu haruka estudante sira ne’e ba mai no kria konfusaun tanba kursu Parteira no Emfermajen iha Universidade Nasional Timor Lorosa’e (UNTL) iha departamentu rua ne’e diak liu fo osan ne’e ba estudante sira atu tuir kursu iha UNTL lapresiza iha liur.