- Publika iha: 15 Março 2012
‘’Hakarak informa deit ba publiko katak iha tinan kotuk pasiente sira ne’ebé rejista ho kazu Mal-Nutrisaun, hamutuk nain sia deit. Ho nune medico sira indika sira atu baisa iha departamentu medisina interna Pediatria Hospital Referral Oé-Cusse hodi submete ba tratamentu intensive,” Direktor Neno hateten.
Maske numero pasiente mal-nutrisaun ne’ebe registo iha HRO konsidera kik, Diretor Neno hateten katak iha komunidade nia hela fatin, kazu mal-nutrisaun iha maibe komunidade mak lakoi lori sira nia familia halo tratamentu iha hospital.
“Dalaruma kazu ne’e barak iha komunidade nia let, maibe sira la konsege atu halo tratamentu. Espera katak serbissu no esforsu Saúde Distrito Oé-Cusse, bele identifika tan kazus mal-nutrisaun hodi hetan tratamentu tamba problema ne’e fasil atu moras sira sel-seluk halo invasaun” Director Neno hateten tan.
Direktor ne’e mos dehan tan katak kauza prinsipal ba kondisaun mal-nutrisaun maka komunidade sira konsome ai-han la iha vitamina, no ekonomia uma laran fraku hodi hola ai- han sira ne’ebé riku ho nutrisaun ka vitamina.
Tuir director Diresaun Agrikultura Floresta e Peska Distrito Oé-Cusse Josê Oki kazu Mal-Nutrisaun mosu ne’e tamba konesementu inan aman sira nia atu utuliza ba produtu local ba konsumo ai-han menus tamba ne’e maka presija ministerius relevantes integrado halo ekstensaun konaba importansia produtu lokal.
“Kopersaun entre ministerio ligados servisu hanesan Saúde, Agrikultura no ONGs ne’ebe serbisu konaba saúde tenke halo sosializasaun para oinsa ita nia inan-aman sira bele kuda prodotu local iha kintal atu nune sira bele utiliza ba ai-han lor-loron nian, la presiza atu hola iha loja ne’ebé karun tebes no kontaminda ho bahan kimia no nia impaktu la diak ba saúde’’ Direktor Oki hateten.
Iha parte seluk Administrador Distrito Oé-Cusse Jose Tanesib Anunu hateten katak problema mal-nutrisaun ka menus ai-han la os tinan ne’e deit maka akontese maibe hahu kedas hosi prosesu ukun rasik a’an iha 1999.
“Tamba ne’e governo buka solusaun hodi koalia ho Agensia internasional WFP hodi bele ajuda ai-han ba labrik kik. Alende ne’e governo servisu hamutuk ho Ministerio Agricultura no Peskas no Ministerio Saude atu promove produto local,” hatete Administrador Anunu.