- Publika iha: 24 Agosto 2011
Ospital Nasional Guido Valadares (HNGV) alende fo tratamentu saude ba komunidade sira mos sai fatin treinamentu ba staf saude sira maibe fatin atu fo treinamentu mak sei limitadu.
“Alende fo treinamentu ba parteira sira iha sala maternidade ami mos fo treinamentu ba parteira sira husi distritu 13 maibe ami iha difikuldade kona-ba fatin atu fo treinamentu,” hateten Diretora Jeral HNGV Odete Viegas, semana kotuk iha Bidau Toko Baru,Dili.
Tanba ne’e, tuir nia, oras ne’e dadaun parte ospital servisu hamutuk ho UNFPA deside atu hadia tiha sala izoladu tuan hodi sai fatin treinamentu.
“Durante ne’e ami uza deit sala maternidade ba treinamentu e ami hare ida ne’e fo impaktu ba inan sira atu partus no mos ba parteira sira ne’ebe hala’o knar ih sala ne’e,”nia dehan.
Nia hatutan, treinamentu ne’e alende ba parteira sira iha Dili husi sala maternidade ospital nian, mos mai husi Klinika Privadu sira, Sentru Saude iha distritu 13 inklui parteira sira husi Ospital Referral sira.
“Treinamentu ne’e foka liu kona-ba emerjensia husi parte opstretik nian ne’ebe importante teb-tebes, e parteira sira bele hatene metode oinsa bele atende pasiente sira ne’ebe atu partus, hahu partus no mos depois de partus, ne’e importante ba sira atu hatene, la’os sira lahatene maibe presiza kapasita sira lor-loron,”nia hateten.
Entretantu Xefe Maternidade HNGV, Maria Saózinha Gomes hateten katak,treinamentu ne’e importante ba parteira sira ne’ebe servisu iha sala maternidade nune’e sir abele fo aisistensia saude neebe diak ba pasiente sira.
“Hau hanoin treinamentu ne’e kapaas hodi aumenta sira nia konesementu, nune’e bele foasistensia ne’ebe diak ba pasiente sira liu-liu iha sala emerjensia no mos ba inan sira ne’ebe atu partus,” nia dehan.