Quarta, Fevereiro 19, 2025

Francisco Pereira hanesan joven ida ho idade (26) husi suku Goulolo, postu-administrativu Cailaco Munisípiu Bobonaro kria grupu ho naran Asosiasaun Rai Osan no Empresta Osan iha Suku (ARIS) hodi fasilita komunidade sira-nia moris liuhusi empresta no entrega fali.

Francisco Pereira hanesan joven ida ho idade (26) husi suku Goulolo, postu-administrativu Cailaco Munisípiu Bobonaro kria grupu ho naran Asosiasaun Rai Osan no Empresta Osan iha Suku (ARIS) hodi fasilita komunidade sira-nia moris liuhusi empresta no entrega fali.

"Ha'u Kria grupu ne'e iha tinan 2019 no ha'u ho idade 20 (ru-nolu), ha'u kria grupu ne'e, tanba hetan formasaun husi NGO ho naran Mercy Crops durante semana 3 kona-ba rai osan no foti osan hodi halo negósiu, ho ida-ne'e hodi ha'u iha inisiativu kria grupu ne’e iha suku Goulolo," dehan Francisco.

Nia hatutan, harii grupu ne'e ho objetivu atu fasilita maluk komunidade liuliu sira ne’ebé iha situasaun difisil nia laran hanesan lia ruma no oan sira-nia eskola bele foti osan ne'e no bele entrega fali osan inan ho funan kiik

“Grupu ne’e mós envolve komunidade sira hodi jere iha grupu ARIS rasik na’in-ruanulu (20), ho objetivu ida atu hanorin komunidade sira rai osan hodi fasilita sira iha situasaun difisil nia laran.

Osan ne’ebé bele fó ba empresta ne’e ba membru sira foti $100 semana ida funan $5, maibé ba sira ne’ebé la’ós membru sira mai foti $100 semana ida funan$10," tenik nia.

Nia dehan, osan ne’ebé sira rai, mai husi membru grupu Asosiasaun Rai Osan no Empresta Osan iha Suku (ARIS) hodi tau hammutuk no fó empresta fali.

Iha sorin seluk Zenadia Maia husi suku Goulolo postu Cailaco, munisípiu Bobonaro hanesan membru no agora haknar-an ona ba xefe grupu hatete, sente kontenti, tanba bele inklina mós iha grupu ARIS.

"Ha'u orgullu tanba bele inklina an iha grupu Aris, grupu ne'e iha tebes benefisiu ba ha'u tanba durante tama iha grupu ne'e bele fasilita ha'u hodi sosa Troktor fila rai (natar), mesin dulas haree no ajuda selu ha'u-nia oan sira ba eskola.

Depois de Inisiadór Francisco Pereira (Siku) kria grupu ne'e, tanba nia kontinua estudu ba Díli, ho ida-ne'e maka ha’u mak sai fali xefe hodi fasilita lalaok hotu iha grupu ne'e rasik no agora dadauk grupu ne'e lao ho di’ak no membru aumenta ona ba ema 20 hodi kontinua lao nafatin," dehan Xefe Grupu Zenadia.

Nia hatutan, Membru barak ne'ebé inklina an iha grupu ida-ne'e hetan moris di’ak ona.

"Banhira harii grupu ida-ne'e hodi ohin loron membru lubuk ida maka moris di’ak ona ka sustenta nessesidade moris no oan sira-nia eskola ho di’ak tebes, aleinde ne'e sira balu hodi loke kios no halo negósiu sira," tenik nia.