Quarta, Fevereiro 19, 2025

Governu liuhusi Ministériu Juventude Desportu Arte no Kultura (MJDAK) hamutuk ho liña Ministeriál sira estabelese Konsellu Nasionál Dezenvolvimentu Juventude (KNDJ) ho objetivu hodi fó apoiu ba joven sira.

Governu liuhusi Ministériu Juventude Desportu Arte no Kultura (MJDAK) hamutuk ho liña Ministeriál sira estabelese Konsellu Nasionál Dezenvolvimentu Juventude (KNDJ) ho objetivu hodi fó apoiu ba joven sira.

Ministru Juventude Desportu Arte no Kultura (MJDAK) Nelio Isaac Sarmento dehan, estabelese KNDJ ne'e hanesan orgaun akonsellamentu ne'ebé liña ministeriál hotu ne'ebé tutela iha área Juventude hodi haree programa ne'ebé estratéjiku ba joven sira.

"Ita estabelese Konsellu Nasionál Dezenvolvimentu Juventude ne'e ho objetivu hodi jere orsamentu no fo apoiu ba joventude sira," nia dehan.

Nia hatete, objetivu ida seluk mak oinsá elabora orsamentu no programa sira, ne'e bele sensitivu uituan ba joven.

"Tanba ita ko'alia kona-ba joven ne'e la'ós ha'u-nia Ministériu mak trata maibé Ministériu ne'e halo polítika ida-ne'ebé estrata polítika governu nian. No oinsá mak halo polítika investimentu ba ita-nia joven.

Ha'u fó ezemplu ida, joven ida hakarak hala'o vida iha área agrikultura maibé laiha kbiit kapasidade finanseiru, oinsá atu ba faze produtu nian. Entaun ita espera katak Ministériu Agrikultura Pekuaria Peskia no Floresta (MAPPF) buka parseiru liu-liu joven sira nune'e iha orsamentu ne'ebé adekuadu hodi apoiu grupu joven sira-ne'e, para sai agrikultór ne'ebé di'ak, sai mós negósiu ne'ebé di'ak iha futuru mai," nia dehan.

Nia dehan, bainhira ko'alia kona-ba agrikultór iha negósiu mak presiza halo parseiru ida ho Ministériu Komérsiu Indústria (MKI) atu nune'e partisipasaun ema ida hosi Kámara Komérsiu Indústria (CCI-TL).

"Tanba ita lakohi joven ida hakarak halo negósiu mak Ministériu Juventude Desportu no Kultura apoiu nia, depois Ministériu Solidariedade Sosiál no Inkluzaun(MSSI), no ministériu seluk mós apoiu. Ida-ne'e osan Estadu nian hotu, entaun ita-nia orsamentu la estratéjiku entaun ita define idea no ida-ne'e ita presiza halo agrupamentu husi kada ministériu nune'e bainhira apoiu tenke husi parte ida. Ho ida-ne'e mak tinan tuir mai bele hetan Juventude ne'ebé mak iha responsabildade, hatene sira-nia dever, nune'e bele kontribui ba dezenvolvimentu nasaun nian iha futuru," nia informa.

Entretantu Joventudi Murisio Cardoso hatete, objetivu estabelese Konsellu Nasionál Dezenvolvimentu Juventude ne'e di'ak tebes atu bele apoiu joven sira, tantu feto no mane sira asesu ba kampu traballu no kria rasik servisu.

"Ita espera liuhusi Konsellu Nasionál Dezenvolvimentu Juventude ne'e bele hala'o nia servisu hodi fó apoiu ba grupu joventude sira iha rai laran hodi kria negósiu ba sira-nia aan no fó servisu ba ema seluk," nia esperansa.

Alende ne'e mós bainhira apoiu ba grupu joven sira labele haree ba kor no rasa, maibé haree ba katak hotu joven no futuru nasaun nian.