- Publika iha: 04 Dezembro 2024
Governu liuhusi Ministériu Juventude Desportu Arte no Kultura (MJDAK) prepara joven sira iha modalidade Basketbol liuhusi kompetisaun iha Kopa MJDAK nian hodi identifika jogadór di’ak sira.
Diretór Jerál Desportu iha MJDAK João Rodrigues dehan, torneu ne'e realiza espesifiku de'it ba modalidade Basketbol ho objetivu atu dezenvolve kompetisaun ne'ebé organizadu hodi identifika jogadór sira ne’ebé kapasidade di'ak bele partisipa iha palku internasionál liu-liu iha Sudeste Aziátiku.
"Ita loke torneiu MJDAK ne'e ba Basketbol atu bele ajuda ami identifika jogadór potensiál sira hodi partisipa iha eventu sira iha Sudeste Aziátiku," nia hatete.
Nia dehan, inisiativa ida-ne'e hodi identifika joven sira liu-liu iha modalidade Basketbol hodi hadia sira-nian dezenpeñu ne’ebé kompetetiva iha nivel internasionál.
"Dadaun ne'e ita prepara sira liuhusi realiza kopa MJDAK nian ba modalidade Basketbol," Diretór Desportu Rodriges informa.
Nia dehan, klube ne'ebé mak rejistu ona iha kopa MJDAK ne'e hamutuk 17 kompostu husi feto hitu (7) mane sanulu (10).
Entretantu Reprezentante Clube Aileba One Shoot Osvalda Pinto dehan, kopa MJDAK ne'e hodi fó oportunidade ba joven sira ne’ebé talentu iha Basketbol atu bele kompete.
"Hodi fó mós oportunidade ba jogadór sira ne’ebé iha esperiénsia kona-ba Basketbol bele hatudu sira-nia abilidade," nia hatete.
Nia dehan, tanba ne'e husi Clube Aileba One Shoot prontu hodi partisipa iha kopa ne'e ho di'ak nune'e mós bele hili ba partisipa iha jogu sira iha Sudeste Aziátiku nian.