- Publika iha: 25 Novembro 2024
Sekretàriu Estadu Arte no Kultura (SEAK) hahú prepara ona rekursu umanu ba kriasaun Akademia Arte iha Timor-Leste (AATL).
Sekretáriu Estadu Arte no Kultura (SEAK) Jorge Cristovão da Costa dehan, preparasaun ba rekursu umanu ne'e (SEAK) kordena ho Fundu Dezenvolvimentu Kapitál Umanu (FDCH) hodi hala'o rekrutamemtu por-meritu ba joven sira hodi ba hala'o estudu kona-ba arte iha Cuba.
"Ita haruka ona joven Timor-oan hamutuk na’in-ne’en (6) ne'ebé mak pasa iha rekrutamentu por-meritu ne’e ba hala'o estudu iha Cuba kona-ba arte nian durante tinan 4," nia hatete.
Nia dehan, ba kriasaun akademia arte ne'e tuir planu prioridade Nonu Governu Konstitusionál nian, tanba ne'e, governu hahú prepara iha rekursu umanu no infraestrutura.
"Ha'u nafatin enkoraja joven sira atu prepara di-diak imi-nia an atu kompete," SEAK Cristovão dehan iha Pantai-Kelapa.
Nia hatete, parabéns ba bolseiru sira tanba liu ona iha selesaun ida-ne'e la'ós buat fasil, maibé sira ultrapasa ho sira-nia esforsu rasik, tanba ida-ne'e la'ós mesak mak tuir ema lubuk ida.
"Futuru ida-ne'e iha imi-nia liman rasik, husu ba família sira atu enkoraja nafatin ba bolseiru sira ne'ebé ba estuda, aproveita didiak oportunidade ida-ne'e atu finaliza imi-nia estudu ne'e ho didiak nune'e fila fali mai servisu iha ita-nia rai ida-ne'e ho di'ak.
Imi mesak joven de'it, futuru sei naruk tanba ida-ne'e mak dala ida tan husu ba ita-boot sira aproveita didiak oportunidade ida-ne'e. Tanba ema barak mak hakarak mais seidauk bele hetan hanesan imi hetan tanba ne'e aproveita didiak," informa.
Entretantu Diretór Ezekutivu Fundu Dezenvolvimentu Kapitál Umanu (FDCH) Julio Aparício dehan, bolseriu sira ba Cuba ne'e ba área Arte, nível lisensiatura, tanba uluk sira remata ona iha diploma 2 iha Cuba.
"Agora sira kontinua ba iha lisensiatura, tanba SEAK rasik dehan sei loke Akademia Arte, entaun ida-ne'e importante tebes atu ita prepara rekursu umanu, no haburas ita-nia kultura iha Timor presiza akadémia ida ne'ebé bele responde," nia hatete.
Nia dehan, finansiamentu ne'e mai husi FDCH, bazeia ba universidade ne'ebé sira sei eskola ba. bolseiru hotu iha direitu hetan seguru saúde, matéria didátiku no kustu de vida.
Iha fatin hanesan, bolseiru Anselmo Hipolito dehan, sira ba hamutuk na'in ne’en (6) feto rua (2) mane haat (4), ba iha espesialidade hanesan, Dansa, Arte Plástika Dezeñu no Múzika.
"Ami kompromete katak ami sei fila ho susesu no fila mai hodi kontribui ba dezenvolvimentu iha Timor-Leste Leste liu-liu iha área arte nian," nia esperansa.