Governu Haruka Fila Traballadór Na'in 1.335 Mai Timor-Leste

Governu liuhusi Sekretáriu Estadu Formasaun Profesional no Empregu (SEFOPE), haruka fila traballadór na’in 1.335 iha Corea do Sul mai Timor-Leste tanba identifika ilegál.

Sekretáriu Estadu Formasaun Profisional no Empregu (SEFOPE) Rogerio Araújo Mendonça hatete, traballadór hirak ne'e haruka fila, tanba sira sai ona husi sistema signifika ilegál no kontra ona lei traballadór Corea nian.

"Ita identifika traballadór Timor-oan oan hamutuk na'in 1.335 no haruka sira fila, tanba servisu ho ilegál iha Corea do Sul," nia hatete.

Nia dehan, Timoroan na’in 1.335 identifika hahú husi tinan 2009 mai to'o 2024 ni'an laran, tanba ne'e hakarak ka lakohi tenke haruka sira fila, tanba kontra lei servísu Corea ni'an.

"Governu liuhosi SEFOPE haruka ona karta ba Governu Corea do Súl kona-ba haruka fila traballadór hirak ne’ebé dadaun ne’e ilegál iha Korea do Súl," nia informa.

Nia dehan, hahalok traballadór hirak-ne'e ni'a fó ameasa ba Timor-Leste no taka dalan ba Timoroan sira seluk ne’ebé hakarak ba servisu iha Corea do Sul hodi hadi'a moris família nian.

Nia informa, total traballadór Timor-oan ne'ebé durante ne'e servisu iha Corea do Súl hahú husi tinan 2009 to'o 2024 hamutuk 6.674 no iha na’in 1.335 mak ilegál ona iha na’in sanulu resin (10-resin) mak haruka fila ona mai Timor-Leste.

Entretantu joven Marito Ximenes dehan, governu Timor-Leste no Corea do Sul tenke foti medida rigorozu ba traballadór sira ne’ebé halai sai husi sistema hodi ba fali ilegál.

"Ida-ne'e bele taka dalan ba ami sira ne’ebé mak dadaun ne'e tuir hela kursu lian Corea ni'an no hakarak atu ba servìsu iha rai Corea hodi bele muda ekonomia uma-laran," nia saliente.

Nia dehan, hahalok traballadór hirak-ne'e labele tolera, atu nune'e sira ne’ebé ba tan labele kontinua hahalok ida-ne'e.