Labarik Feto 61,374 Sei Simu Vasinasaun HPV Hodi Prevene Kankru Servís

Labarik feto idade 11-14 hamutuk rihun neennulu resin ida, atus tolu hitunulu resin haat (61,374) sei simu vasinasaun Virus Papiloma Umamu (HPV) atu hodi prevene husi moras kankru servís.

Vise-Ministru Saúde ba Asuntu Fortalesimentu Institusional Saúde José dos Reis Magno hateten, moras kankru servís ne'e moras la di'ak, tanba ne'e labarik feto sira ho idade 11-14 tenke hetan vasina HPV atu nune’e bele prevene kedas atu la bele kona-ba moras ne'e.

"Labarik feto idade 11-14 iha Timor-Leste hamutuk 61,374, tanba ne’e Ministériu Saúde orgullu atu introdús vasina HPV ba iha programa imunizasaun rutina. Ida-ne'e konsidera hanesan atendimentu signifikativu ida iha istória programa imunizasaun nian iha Timor-Leste," dehan Vise-Ministru Saúde iha serimónia lansamentu vasinasaun HPV, iha Palácio Prezidenti Aitarak-Laran, Díli.

Nia hatutan, ida-ne'e mós hatudu Ministério Saúde nia kompromisu konjunta ba iha esforsu global ba prevensaun moras kankru servís iha Timor-Leste.

Nia mós fó apresiasaun ba doadór no parseiru dezenvolvimentu hotu hanesan GAVI, DFAT, UNICEF, OMS no World Bank ne'ebé suporta ona Ministério Saúde iha inisiativa ne'e.

Iha fatin hanesan reprezentante UNICEF, Patrizia DiGioyani hateten, programa vasinasaun HPV ne'e di'ak tebes, atu nune'e bele prevene feto no labarik feto sira atu labele kona moras kankru servís ihafuturu.

"Kankru servís ne'e hanesan moras ida ne'ebé bele prevene, tanba ne'e liu husi vasinasaun HPV ne'e ona prevene moras kankru servís ba feto no labarik-fetosira ho idade 11-14 ba tinan naruk," dehan Reprezentante UNICEF.

Nia hatutan, feto no labarik-feto sira iha Timor-Leste agora iha oportunidade di'ak atu hetan protesaun husi moras ida-ne'e tanba ne'e husu atu labarik-feto sira ho idade 11-14 tenke hetan hotu vasina.

"Ami husu ba Ministériu Saúde atu forma sinerjia forte ho ministériu oioin no komunidade sira hodi garante labarik feto sira ne'ebé elijivel tenke hetan asesu másimu ba vasinasaun ne'e liuliu sira ne'ebé jeografikamente dook husi asisténsia saúde," nia afirma.