CHC Vera Cruz Rejista Bebé Idade fulan 0-6 Na’in 117 Sofre Malnutrisaun

Koordenadór Nutrisaun, iha Sentru Saúde Komunitária Vera Cruz, António da Cruz informa iha fulan-setembru tinan 2023, sira rejista labarik idade fulan 0 até 6 hamutuk na’in 117 husi 1311, ne’ebé vizita fasilidade saúde mak sofre malnutrisaun.

Nia dehan indikadór ne’ebé sira uza mak kompara todan ba idade, entaun bebé na’in 117 sobre malnutrisaun ne’e, na’in 80 malnutrisaun nivel moderadu no na’in 37 iha nivel grave.

“Sira monu ba malnutrisaun moderadu no grave, tanba sofre moras diarea. Moras diarea ne’e bele f’o impaktu ba labarik bele monu ba malnutrisaun, tanba ambiente ne’ebé la moos implika ba sira-nia saúde,” nia hateten iha servisu fatin Vera Cruz, Díli.

Nia hateten hahu fulan-jullu tinan 2023, distribuisaun suplementu nutritivu superserial ba inan isin-rua no inan fó susu paradu, tanba ne’e husu atu Ministériu Saúde no parseru dezenvolvimentu ne’ebé apoia ba programa ne’e bele aselera stoke hodi distribui fali ba sentru saúde sira atu bele halo intervensaun ba inan isin-rua no inan fó susu sira ne’ebé malnutrisaun.

Nai hatutan aleinde bebé, sira mós identifika labarik idade fulan 6 to’o tinan lima hamutuk na’in 30 husi total 783, ne’ebé vizita fasilidade saúde sobre malnutrisaun moderadu no grave, tanba sira nia liman kabun leten menus husi 13 cm.

“Ita deteta labarik malnutrisaun moderadu mak ita halo intervensaun apoia aihan suplementu nutritivu, maibé to’o agora stok seidauk iha, tanba ne’e ita fó de’it akonsellamentu ba inan sira prepara aihan nutritivu husi grupu aihan tolu ba labarik sira han hodi ajuda labarik sira rekupera husi malnutrisaun moderadu,” nia hateten

Nia haktuir ba labarik sira ne’ebé kategoria grave no iha moras komplikasaun seluk, sira refere halo internamentu ka baixa atu hetan tratamentu no ekipa nutrisionista halo intervensaun fó apoia susuben F75 no F100 atu ajuda rekupera.

Iha parte seluk, Ministra Saúde, Elia dos Reis Amaral hateten, aihan nutritivu ba inan isin-rua no inan fó susu, tama ona iha armajen sentral, tanba ne’e sei halo distribuisaun ba fasilidade saúde sira atu bele apoia ba inan isin-rua no inan fó susu sira ne’ebé ho malnutrisaun.

“Kontentór ida horisehik tama ona, ha’u ba loke haree iha aihan nutritivu apoia inan isin-rua sira no iha mós aimoruk magnesium sulfat inklui aimoruk balun ne’ebé espesialista sira husu,” nia hateten.

Nia hatutan iha fulan-novembru no dezembru laran aimoruk kontentór sei to’o iha Timor-Leste hodi responde ba preokupasaun públiku nian, liu-liu pasiente sira kona-ba falta médikamentu.