Quinta, Julho 18, 2024

United Nation Children Fund (UNICEF) ho Ministériu Públiku (PM) realiza konferénsia internasional kona-ba dezenvolvimentu protesaun direitu labarik iha Timor-Leste.

United Nation Children Fund (UNICEF) ho Ministériu Públiku (PM) realiza konferénsia internasional kona-ba dezenvolvimentu protesaun direitu labarik iha Timor-Leste.

Reprezentante UNICEF iha Timor-Leste Bilal Aurang Durrani dehan, konferénsia internasional ne'e hanesan oportunidade di’ak ida hodi halo revizaun krítika no sujere asaun pozitivu sira hodi fornese forma adekuadu hodi apoiu di’ak liuba labarik sira ne’ebé la hetan kuidadu husi inan-aman.

"Unicef envolve iha konferénsia ne'e hodi reflete Ita-nia komprimisiu atu apoiu asaun ne’ebé fó ba labarik hodi moris di’ak, garante saúde di’ak, kuidadu nutrisaun, edukasaun no protesaun husi violénsia," nia dehan.

Nia dehan, husi artigu 9 husi Konvensaun Direitu Labarik (KDL) ne’ebé Timor-Leste ratifika ona iha tinan 2003, subliña katak ambiente família nian fornese kresimentu no dezenvolvimentu di’ak ba labarik, maibé sosiedade sempre husik labarik la hetan kuidadu husi família.

"Husi hahalok ida-ne'e mak halo labarik balun mate, ki’ak, difisiénsia, abuzu violénsia, no neglijénsia hirak ne'e mak sai fatór no oinsa atu bele halo prevensaun," nia dehan.

Tanba ne'e nia dehan, atu halo prevensaun ba hahalok hirak ne'e Unicef servisu hamutuk ho Ministériu Públiku hodi integra modulu direitu labarik iha sentru formasaun jurídiku no haforsa profesional legál sira-nia abilidade atu defende direitu labarik sira-nain.

Iha fatin hanesan Prokurador Jerál Repúblika Alfonso Lopes dehan, iha estudu sira hatudu katak ki’ak no eskluzaun sosial nu’udar fatór sira ne’ebé infuénsia ba asesu direitu fundamental labarik sira-nain.

"Obrigasaun família, komunidade no estadu atu proteje labarik sira-nia direitu fundamental, tanba labarik sira mak futuru nasaun nian. Ne'e parte kompetente hotu tenke hala'o knaar hodi proteje labarik sira-nia moris diak iha Timor-Leste," nia dehan.

Tanba ne'e fiar ho konferénsia internasional ida-ne'e bele hetan solusaun di’ak hodi hadia dezenvolvimentu labarik nia moris di’ak iha Timor-Leste.