Quinta, Julho 18, 2024

Diretór Jerál, iha Sekretária Estadu Formasaun Profisionál no Empregu (SEFOPE), Paulo Alves, informa hahú inisiu haruka joven Timoroan ba servisu iha Korea Sul iha tinan 2009 no Australia iha tinan 2011, sira rejista joven na’in 13 lakon vida iha Korea Sul no na’in 5 iha Australia, tanba hetan asidente iha tasi durante servisu, asidente tráfiku, oho-aan no tanba moras.

Diretór Jerál, iha Sekretária Estadu Formasaun Profisionál no Empregu (SEFOPE), Paulo Alves, informa hahú inisiu haruka joven Timoroan ba servisu iha Korea Sul iha tinan 2009 no Australia iha tinan 2011, sira rejista joven na’in 13 lakon vida iha Korea Sul no na’in 5 iha Australia.

Nia dehan sira simu ona informasaun joven ida mate tan iha Korea Sul, maibé seidauk hetan informasaun klaru kona-ba kronolojia loloos husi joven ne’e nia mate, tanba prosesu investigasaun sei la’o hela iha Korea.

“Ba Korea Sul, desde inisiu, to’o agora, sira hamutuk na’in 13 mak lakon vida. Husi ne’e na’in 1 tanba moras, 2 tara aan, na’in 4 hetan dezastre iha tasi-laran no seluk hetan asidente tráfiku hanesan foin dadaun na’in 2 motorizada soke no karreta soke, monu mate.

Iha Australia, desde inisiu ita haruka to’o agora sira mate hamutuk na’in lima. Na’in 2 kazu primeiru ba servisu mak mate, na’in 1 iha Tasmania lori karreta monu sai husi karreta mate, na’in 1 foin dadaun ba servisu fila uma derepente mate no 1 seluk rai lakan nakfera soke mate,” nia hateten hafoin partisipa iha aprezentasaun relatóriu peskiza kualidade sentru formasaun vokasional ba foinsa’e sira hodi responde ba demanda merkadu iha Timor-Leste, iha salaun HAK Farol, Díli.

Nia hateten governu asume responsabilidade hodi prosesu no lori mate isin sira ne’e hotu fila mai Timor-Leste no entrega ba família sira.

Nia hatutan joven ne’ebé foin mate iha semana kotuk, sira halo ona kontaktu ho embaixadór no pessoal iha Korea Sul atu akompaña prosesu investigasaun no trata dokumentu sira atu lori mate isin fila mai Timor.

Nia haktuir traballadór sira ne’ebé mate iha Korea Sul no Australia, liu-liu sira ne’ebé sei iha sistema laran kompaña iha obrigasaun atu fó kompensasaun ba sira no iha rai rua ne’e kompensasaun ne’e direitu absoluta traballadór nian. Maibé presiza trata dokumentu administrativu no diskute ho kompaña sira kona-ba dokumentu ne’ebé sira presiza.

Iha parte seluk, Diretór Ezekutivu FONGTIL, Valente da Costa Pinto preokupa ho servisu adidu traballadór sira-nian iha Korea Sul no Australia atu tau matan ba traballadór sira, tanba metade traballadór sira ne’ebé servisu iha rai rua ne’e ses husi sistema no problema ne’ebé sira enfrenta.

Nia dehan joven sira-ne’e ses husi sistema ba buka rasik servisu iha ema nia rai no balun hasoru problema ne’ebé lori sira ba risku to’o ikus mai hetan dezastre iha tasi, lori motorizada soke monu mate no balun mós hili dalan tara aan.

“Adidu traballadór loloos sira servisu besik liu traballadór sira. Sira tenke hatene traballadór sira servisu iha ne’ebé, kondisaun ne’ebé kompaña fornese ba sira, problema saida mak sira hasoru intermus problema lei, komitmentu servisu ou selu mak halo sira sai husi sistema atu fo informasaun sira ne’e mai governu sentral hadia,” nia hateten.

Nia hateten traballadór sira sai husi Timor-Leste ba Korea Sul no Australia akompaña husi delegasaun SEFOPE nian, depois fulan tolu no neen barak mak ses aan husi sistema ida-ida ba buka servisu rasik. Ne’e problema ne’ebé seriu, governu tenke konsidera no hadia servisu sira ne’e atu joven sira ne’e ba servisu iha ema nia rai mós hetan protesaun husi estado.

Nia hatutan adidu traballadór nia knar tenke forte liutan no asume duni responsabilidade atu tau matan ba traballadór sira iha Korea Sul no Australia.