Promove Prátika Ijiene Pesoál Prevene Moras Reumatismu Fuan Ba Labarik

Médiku Espesialista Fuan, iha Hospital Nacional Guido Valadares (HNGV), Herculano Seixas hateten labarik idade tinan 5 até 15 barak mak sofre moras reumatismu fuan, tanba sosiedade seidauk tau importánsia promove prátika ijiene pesoál iha família no laiha kondisaun bázika atu ema prátika ijine pesoál tuir padraun saúde nian.

Nia dehan númeru moras fuan ida-ne’e iha tendénsia sa’e makas, tanba tinan 2023, ne’e sira rejista ona kazu hamutuk 446 resin, ne’ebé afeta barak liu labarik sira ho idade tinan 5 até 15.

“Fatór risku ne’ebé mak kontribui labarik sira hetan moras reumatismu fuan mak ida sira-nia ijiene pesoál. Labarik barak la kose nehan, nehan ular halo infesaun barak iha ibun laran lahalo tratamentu di’ak hamosu infesaun iha fuan,” nia hateten iha servisu fatin Bidau, Díli.

Nia konsente situasaun reál ne’ebé iha rai-laran katak problema infrastrutura bázika, kondisaun sosio-ekonomia família no menus koñesimentu kona-ba importansia ijiene pesoál ba prevensaun moras.

Nia hateten tratamentu ba moras reumatizmu fuan ne’e iha faze tolu mak prevensaun primaria katak eduka komunidade prátika ijine pesoál no halo tratamentu ba moras infesaun sira atu evita hamosu infesaun ba fuan. Faze daruak mak pasiente ho reumatismu kman sona antibiotika fulan-fulan atu evita infesaun iha valvula labele progresa lalais no tratamentu médiku ho aimoruk ba sira ne’ebé iha nivel grau moderadu atu evita fuan falla. Faze datolu mak tratamentu ba komplikasaun sira ne’ebé problema valvula todan tenke halo operasaun troka valvula ne’ebé seidauk bele halo iha rai-laran.

Nia informa moras reumatismu faun ne’e kauza husi bakeria streptococcus, tanba ne’e atu prevene tenke prátika ijiene pesoál, liu-liu ba labarik sira.

Iha parte seluk, inan Domingas Soares husu Ministériu saúde, liu-liu profisionál saúde sira atu halo edukasaun promosaun saúde atu hasa’e konsiénsia komunidade nian atu fó importánsia ba ijiene hodi prevene moras.

“Informasaun sira-ne’e importante tebes ba komunidade, liu-liu iha área rurál atu bele hatene no enkoraja oan sira prátika ijiene pesoál hodi prevene moras sira la’ós de’it moras fuan, maibé moras seluk,” nia hateten

Nia dehan mekanismu ida ne’ebé diak liu mak hakbi’it profesór sira nia koñesementu hodi bele transforma informasaun sira-ne’e ba estudante sira iha eskola.