Terça, Maio 21, 2024
Total visitors: 766366

Prezidente Repúblika, José Ramos Horta hateten governu halo esforsu barak ona atu redús taxa mortalidade inan no oan, maibé taxa sei aas 159/100,000 inan partu moris, tanba investimentu seiduak másimu, laiha intensivu ba profesionál saúde sira, kondisaun infrastrutura la sufisiente, limitasaun apoia diagnóstika no medikamentu iha fasilidade saúde.

Prezidente Repúblika, José Ramos Horta hateten governu halo esforsu barak ona atu redús taxa mortalidade inan no oan.

Prezidente garantia sei kontinua fó hanoin governu atu aloka orsamentu bo’ot ba setór saúde hodi mellora infrastrutura ospitál referral sira, transporte ambulánsia sufisiente, atualiza ekipamentu sira no profesionál saúde sira, liu-liu sira ne’ebé iha suku tenke iha kondisaun ne’ebé dignu atu sira bele fó atendimentu saúde ba komunidade.

“Ha’u nia hanoin Sentru Kuidadus Emerjénsia Obstetriku no Neonatal-Baziku ne’e pelumenus bele hahú ida kada munisípiu, depois kada subdistritu no suku. Atu harii fasilidade ne’e ladun karun bele orsamentu ita-nian no doadór sira mós prontu atu ajuda. Ha’u prontu ajuda governu mobiliza doadór sira seluk husi rai-liur sira prontu ajuda,” nia hateten hafoin akompaña Embaxadora Boa Vontade Fundu Nasoens Unidas ba Populasaun (UNFPA) Catarina Furtado, vizita sala maternidade no pedatria Hospital Nacional Guido Valadares (HNGV) Bidau, Díli.

Nia hateten fasilidade ne’e, UNFPA ajuda harii ona iha munisípiu balun no espera ho vizita Embaxadora Catarina Furtado nian mai Timor-Leste, hodi haree situasaun reál no nesesidade ne’ebé iha bele influénsia doadór sira seluk iha Europa no Nasoens Unidas bele apoia liutan programa saúde maternu-infantil.

Iha parte seluk, Embaxadora Boa Vontade UNFPA, Catarina Furtado hateten apresia ho simpatia no kariñu populasaun, sosiedade sivíl, governu, parlamentu nasionál no presidente repúblika, tanba bele rona no aseita asuntu saúde maternu-infantil, igualdade jenéru no joventude sai prioridade importante ba estadu ida-ne’e.

“Ha’u gosta ho rezultadu ne’ebé ha’u hetan husi vizita ida-ne’e, ha’u haree katak iha vontade bo’ot tebes ba ema atu servisu no kolabora hamutuk. Ha’u sente iha sensu ida husi governu katak governu aseita tebes no simu buat ne’ebé durante ne’e ha’u halo advokasia atu investe osan no rekursu hodi hadia área saúde maternu–infantíl. Ha’u gosta mós katak ema barak iha ona komprensaun no iha vontade atu muda mentalidade nune’e bele kontribui ba redusaun taxa mortalidade inan,” nia hateten liuhusi konferénsia imprensa.

Nia hateten UNFPA sei kontinua servisu makas ajuda governu intermus eleva kapasidade sala-maternidade iha sentru saúde internamentu 34 ba Sentru Kuidadus Emerjénsia Obstetriku no Neonatal-Baziku, fó formasaun ba profesionálsaúde sira, apoia ekipamentu medika no non médiku atu fasilita pesoál sira jere kazu inan partu ho komplikasaun hodi hetan konfiansa husi inan sira partu iha fasilidade saúde.

“Iha Timor-Leste, 51% inan sira sei hakarak partu iha uma. Ha’u-nia esperiénsia loron rua liuba ha’u ba vizita sentru saúde Gleno ha’u rona informsaun katak tinan ne’e iha inan na’in tolu mate. Kazu tolu ne’e akontese iha suku ida de’it. Inan sira-ne’e mate, tanba tuur ahi iha uma depois laiha atendimentu, iha enfermeiru ida ne’ebé ba maibé karik laiha ekipamentu no abilidade sufiseinte atu jere. Entaun governu tenke hanoin atu rekruta médiku no partiera barak ne’ebé oras ne’e la serbísu bele fó servisu sira atu ba iha área sira ne’ebé remota,” nia preokupa.

Nia hatutan kontinua apoia governu liu husi rekolla dadus sira, hodi influénsia governu aloka orsamentu ne’ebé própriuba saúde maternu-infantíl, tanba orsamentu ne’ebé aloka ba saúde ki’ik loos no ba saúde maternu-infantiíl ki’ik liutan $176,000 kada tinan.