Domingo, Abril 21, 2024
Total visitors: 766366

Falintil-Forsa Defesa Timor-Leste (F-FDTL) liuhusi Unidade Polísia Militár (PM) asegura ona membru ida ne’ebé uza arma hodi tiru joven ida iha munisípiu Liquiçá foin lalais.

Falintil-Forsa Defesa Timor-Leste (F-FDTL) liuhusi Unidade Polísia Militár (PM) asegura ona membru ida ne’ebé uza arma hodi tiru joven ida iha munisípiu Liquiçá foin lalais.

Xefe Estadu Maior F-FDTL Tenente Jeneral Domingos Raul Falur Rate-Laek dehan, depois de membru ne'e utiliza arma hodi alegadamente halo krime refere, Komandu orienta kedas Polísia Militár hodi foti membru refere no asegura ona iha sela PM nian.

"Membru ne'e destaka iha Postu Liquiçá nian, dadaun ne'e ita asegura hela iha sela PM hodi submete ba prosesu," nia dehan.

Nia dehan, dadaun ne'e prosesu investigasaun ba membru refere seidauk remata.

"Membru ne’ebé utiliza kilat tiru povu ne'e, komandu la iha toleránsia. Ita prosesu tuir krime nian, nune'e mós prosesudisiplinár nian," Tenente Jeneral Falur Rate-Laek dehan.

Nia dehan, kazu tiru joven iha festa Liquiçá ne'e, envolve membru na’in haat, maibé na’in tolu aplika ona sansaun disiplinár no haruka fila ba sira nia baze, no ida mak sei asegura iha sela detensaun PM nian, tanba nia mak deskonfia nudar autór prinsipál.

"Komandu F-FDTL ita iha regra, tanba ne'e prosesu Investigasaun la'o hela, depois aplika ona prosesu disiplinár kontinua prosesu kriminál ba oin," nia dehan iha UAS.

Enkuantu nia dehan, membru F-FDTL ne'e tenke kontinua prosesu kriminál ba oin, tanba parte família vítima halo hela komunikasaun ho Komandu F-FDTL hodi buka solusaun ba kazu ne'e.

Iha parte seluk, Diretór Ezekutivu Fundasaun Mahein (FM), Nelson Belo dehan membru F-FDTL ka PNTL, bainhira utiliza kilat la’ós ba servisu maibé ba festa hodi halo krime ne'e labele tolera tenke prosesu tuir lei.

"Tenke aplika prosesu disiplinár nune'e mós prosesu tuir dalan krime nian iha tribunál," nia dehan.

Nia dehan, atu nune'e membru sira bele tauk utiliza arma, bainhira utiliza, tenki tuir orden servisu nian, la’ós ba festa.