- Publika iha: 19 Julho 2023
Sekretáriu Estadu Formasaun Profesionál no Empregu (SEFOPE), Rogério Araújo Mendonça halo enkontru ho responsável empreza CWP Global, LTD no reprezentante governu sidade Fuquay iha Japaun, diskute programa formasaun professional no kampu servisu ba joven sira.
Nia dehan empreza CWP Global, governu anteriór estabelese ona akordu ho sentru formasaun Tibar nian, atu haruka formadu sira tuir formasaun iha Japaun, tanba ne’e presiza reve fali akordu ne’e hodi garantia joven sira tuir formasaun no servisu iha Japaun ho seguru.
“Kultura nasaun ida ho nasaun seluk la hanesan tanba ne’e ita, tanba ne’e estadu Timor-Leste, liuhusi polítika Sekretáriu Estadu Formasaun Profesionál no Empregu atu asegura ema ida ne’ebé ita atu haruka ba servisu iha fatin seluk tenke fó formasaun adekuadu no di’ak.
Atu bainhira sira servisu iha fatin ne’ebé sira servisu ba, bele adapta ona servisu ne’ebé iha,” nia hateten hafoin enkontru ho responsavel empreza CWP Global no reprezentantu governu sidade Fuquay iha salaun SEFOPE Kaikoli, Díli.
Nia hateten importante mós atu haree fali regra no prosedimentu sira kona-ba haruka traballadór sira ba servisu iha rai-liur, tanba dadaun ne’e servisu na’in barak iha Korea do Sul no Australia, halai sai husi sistema.
Nia hatutan servisu na’in sira barak viola kontratu halai sees husi kontratu inisiu, tanba de’it problema vensimentu, liu-liu kontratu inisiu ho vensimentu ki’ik hetan empreza seluk oferese vensimentu bo’ot liu, mak sira husik hela kontratu inisiu.
Entretantu, Eis Sekretário Estado Formasaun Profesionál no Empregu, Nivio Magalhães hateten governu tenke investe makas hodi hasa’e kualidade formasaun atu prepara joven sira-nia koñesimentu no abilidade hodi kompete iha merkadu servisu nian.
“Ha’u hanoin presiza iha atensaun ba sentru formasaun sira. Sentru formasaun sira tenke haree ba kualidade formadór, fasilidade no tenke iha osan atu bele apoia sira-nia sentru,”
“Importante mós la’ós harii sentru formasaun de’it, maibé oinsa liga kursu sira-ne’e ho merkadu traballu. Ezemplu merkadu presiza soldadura, maibé formasaun barak liu língua ne’e, la kona tanba ne’e hasa’e kualidade haree mós relevánsia atu prodús ema prontu kompete iha merkadu, se la’e prodús ema sai fali dezempregu nafatin,” nia hateten.
Nia hateten governu mós tenke hanoin ona atu kria kondisaun aproveita joven sira ne’ebé fila fali mai rai-laran atu halo buat ruma fó fali servisu ba ema barak, tanba laiha programa própriu mak sira fila mai sai fali dezempregu.
Iha parte seluk, Presidente Empreza CWP Global, LTD, Kon Yosuke hateten sira iha komitmentu atu fó formasaun ba joven sira iha área Enjeñaria manutensaun ba sistema bee nian.
“Ami iha planu atu treinu joven sira iha Japaun, atu sira bele iha abilidade ho standar Japaun nian, iha área manutensaun ba sistema bee hodi bele mai servisu fali iha rai-laran,” nia hateten.
Nia espera governu, liuhusi SEFOPE bele halo mapamentu ida hodi hatene situasaun atuál no nesesidade formasaun sira hodi aprezenta ba governu Timor no Japaun atu bele hahú formasaun sira.