- Publika iha: 19 Julho 2023
Polísia Nasional Timor-Leste (PNTL) identifika ona rede tráfiku humanu ne’ebé mak durante ne’e halo rekrutamentu ilegál ba Timoroan sira hodi ba servisu iha Malazia.
Xefe Departamentu Investigasaun Kriminal (DIK), Superientendente Xefe João dos Reis, dehan rede tráfiku humanu refere halo rekrutamentu ba Timoroan na’in 11 ho ilegál via online hodi ba servisu iha Malazia.
Nia dehan, Timoroan hirak ne’e, servisu migrasaun Malazia nian deporta fila ona mai Timor-Leste iha fula jullu nian laran 2023 ne’e, tanba identifika bosok husi ajénsia sira.
“Ita identifika ona rede tráfiku humanu hirak ne’ebé durante ne’e halo rekrutamentu ilegál ba Timoroan sira ne’e, husi Timor-Leste rasik mak bosok malu, ita nafatin buka dadus atu bele kompleta hodi kaptura ho prosesu tuir lei,” nia dehan.
Nia dehan, sira identifika ona rede tráfiku humanu rua ka tolu hanesan, maibé sei iha prosesu nian laran, no espera katak sira sei responsabiliza ba aktu krime ne’ebé sira halo hodi ema seluk sai vítima.
“Husu ba vítima sira atu bele kopera ho polísia nune’e bele fo deklarasaun ne’ebé los atu nune’e bele prosesu lalais ba autór tráfiku humanu hirak ne’ebé mak identifika ona,” Xefe DIK Superientendente Xefe Reis dehan iha Kaikoli, Díli.
Alende ne’e mos husu ba Timoroan hotu liu-liu ba sira ne’ebé buka hela servisu, atu labele fiar rekrutamentu husi online, tanba maioria bosok de’it no bele fó risku ba vida.
Entretantu, Diretór Fundasaun Mahein (FM), Nelson Martins, dehan rekrutamentu Australia, Corea no nasaun seluk, ne’e tenke tuir dalan ne’ebé mak legál no rekoñese husi governu.
“Bainhira ita tuir rekrutamentu ilegál sira mak ita ba servisu iha ema nia rain, sei la hakmatek tanba ema nia migrasaun buka tuir hela de’it, nune’e mós sira promete dehan ba hetan saláriu hanesan ne’e, to’o iha ne’ebá kompañia uza ita-nia tenaga de’it,” nia dehan.
Tanba ne’e nia dehen, liga ho situasaun ne’e polísia tenke buka tuir autór ba tráfiku humanu sira-ne’e, atu nune’e sira labele kontinua bosok joven sira.