Labarik Na’in 300 Envolve Atividade Ekonomia Iha Díli Laran Maioria Eskola

Diretor Instituto Nasional Direito Crianças (INDC), Dinora Gardinerho dehan, tuir dadus ne’ebé mak sira iha kona-ba labarik hamutuk na’in 300 ne’ebé mak envolve iha atividade negósiu iha Díli laran ne’e, maioria eskola.

Nia dehan, labarik hirak ne’e halo atividade negósiu banhira oras fila husi eskola, mak sira ajuda inan-aman faan sasan balun, faan ema seluk nia sasan hodi bele hetan osan hodi ajuda ekonomia uma laran maské la’ós responsabilidade sira-nian.

“Maské la’ós responsabilidade sira-nian, maibé husi dada lian ne’ebé mak halo ho sira, iha rezultadu katak sira rasik mak hakarak halo atividade negósiu hodi tulun inan-aman depois fila husi eskola atu nune’e bele hetan osan,” nia dehan.

Nia dehan, atividade ekonomia ne’ebé mak labarik sira envolve mak hanesan, faan has, faan, mantolun la’o ba mai iha fatin públiku sira iha kapitál Díli.

“Tuir dadus ne’e ita rejista labarik hamutuk 300 mak envolve iha atividade ekonomia iha kapital Díli maibé husi labarik hirak ne’e maioria eskola hotu,” Diretora INDC Gardinheiro dehan.

Nia hatete, liga ba situasaun hirak ne’e governu iha ona mekanizmu atu bele kontrola envolvimentu labarik sira iha atividade ekonomia, ida mak tenke iha baze legál, ida tan mak oinsá governu bele fasilita família sira ne’ebé rendimentu kiik, atu bele hadia nune’e labele fó impaktu ba labarik sira.

“Mekanizmu ne’e governu tenke kria, ita espera katak governu bele iha hanoin nune’e bele redús labarik sira-nia envolvimentu iha atividade ekonomia nian,” nia esperansa.

Entretantu, labarik inisial AM ho idade tinan 9 dehan, nia faan sasan ne’e hanesan maneira ida ne’ebé halo hodi tulun inan-aman ba nesesidade uma laran nian nune’e mós sosa kadernu ba eskola.

“Ha’u rasik mak harak faan iha tempu sai husi eskola, tanba ne’e livre ona, ha’u uza hodi halimar de’it sei la hetan buat ida, maibé ha’u foti dezisaun, tempu livre ne’e ha’u faan sasan hanesan has no mantolun ne’ebé mak prepara ona husi ha’u-nia mama atu bele hetan osan,” nia dehan.

Enkuantu nia dehan, iha sira-nia familia, nia hanesan oan mane bo’ot, nia iha alin na’in tolu nia inan iha uma de’it tanba haree nia apa ne’ebé mak ho kondisaun moras, no durante ne’e sira-nia nesidade lor-loron depende atividade ekonomia ne’ebé mak sira halo nune’e mós kioske ki’ik oan ne’ebé mak nia mama faan iha uma.