Sexta, Junho 14, 2024
Total visitors: 766366

Eleitores foun husu governu foun tenke kria kampu servisu ba joventude sira tantu iha rai laran no rai liur atu nune’e bele evita konflitu iha rai doben Timor-Leste.

Eleitores foun husu governu foun tenke kria kampu servisu ba joventude sira.

Eleitore foun iha Suku Manlala, Postu Admistrativu Soibada Bendito da Silva dehan, kriasaun kampu servisu ba joventude sira ne’e importante tebes hodi prevensaun konflitu, tanba bainhira joventude sira hotu iha ona servisu, nia fiar katak problema sei la akontese tan.

“Ami joventude husu governu foun tenke tau prioridade hodi kria kampu servisu, hodi fasilita ami joventude sira, tanba banhira joventude sira sibuk ona ho servisu, sei la iha tan oportunidade hodi kria problema,” Juventude Silva dehan iha Soibada.

Nia dehan, governu tenke kria dados liuliu kona ba joventude sira hodi hatene katak joventude hira mak servisu ona no hirak mak seidauk, atu nune’e bele loke kampu servisu hodi inklina sira ne’ebe seidauk servisu hodi bele servisu.

“Joventude mak futuru nasaun nian, maibe governu rasik la iha intrese hodi investe ba kampu servisu, ida ne’e oinsa atu bele prepara sira hodi sai lideransa nasaun iha futuru,” nia hatete.

Tanba ne’e nia dehan, hanesan joventude nia esperansa ba governu foun ne’e mak kria kampu servisu ba joventude sira.

Entretantu, eleitor foun iha suku Leo-Haat, Postu Admistrativu Soibada, Estevao Baptista dehan hanesan joventude husu governu foun tenke realiza programa sira ne’ebe mak koalia iha momentu kampaña, liu-liu kria kampu servisu ba joventude, nune’e mos halo dezenvolvimentu iha setor edukasaun.

“Kampu trabalho ne’e ba joventude sira ne’e la’os iha rai laran deit, maibe governu foun tenke iha inisiativa hodi kopera ho nasaun seluk hanesan Corea, Australia, nune’e mós Polandia atu bele fasilita ami joventude bele ba servisu hodi hadia ami nia moris,” nia dehan iha Soibada.

Tanba ne’e nia dehan, governu foun tenke realiza nia komprimisu sira, labele promete deit iha tempu kampaña depois ukun tiha finjidu tiha.

Iha parte seluk, eleitor foun iha Suku Fatumakerek, Nelidia da Costa Alves dehan, esperansa ba governu foun ne’e tenke tau matan iha setor edukasaun, saude, infraestrutura nune’e mos kampu servisu ba joventude sira iha rai laran.

“Iha setor edukasaun ita husu governu tenke loke eskola ne’ebe mak asesibilidade ba ema hotu tantu difisiente, normal, nune’e mos ema sira ne’ebe mak para tiha eskola no hakarak atu kuntinua fali,” Alves dehan.

Enkuantu kona ba setor saude, nia dehan tenke kria sentru saude iha postu to’o suku, hodi fasilita komunidade sira bele asesu ho lalais, nune’e mós liuhusi estrada ne’ebe mak diak.

“Ita husu atu loke kampu servisu ba joventude tantu feto no mane sira,” nia dehan iha Soibada.

Nia dehan, loke kampu servisu ba joventude sira mos hola parte ida hod iha menus konflitu no kuntribui ba paz no estabilidade iha rai doben Timor-Leste.