- Publika iha: 11 Maio 2023
Koordenadór Rede Defensór Direitus Umanu (RDDU), Inocêncio Xavier, apela ba inan-aman sira iha territóriu tomak atu fó prioridade ba oan sira-nia seguransa, labele lori oan sira ba tuir atividade kampaña polítika.
Nia dehan sira-nia observasaun haree katak akontese ensidénsia tuda malu barak iha territóriu, liu-liu iha Oecusse, Manufahi, Viqueque, Baucau no área sira iha Díli laran, entaun situasaun sira hanesan ne’e fó risku ba labarik sira.
“Alerta ba inan-aman sira iha área remota, liu-liu sira-ne’ebé sei nafatin envolve oan sira. Alternativa seluk mak ita nontong de’it husi ita-nia telefone smart phone hodi evita lori ita-nia oan ba tuir kampaña tanba mosu insidente ruma ataka malu ita labele salva ita-nia oan,” nia hateten liuhusi konferénsia imprensa iha sentru informasaun FONGTIL Kaikoli, Díli.
Nia mós husu inan isin-rua sira atu hakmatek iha fatin, akompaña de’it kampaña polítika sira husi notisia no live streaming ne’ebé jornalista sira halo no media partidu polítika sira ida-ida halo hodi evita envolvimentu labarik nian no ema vulnerável iha atividade kampaña.
Iha oportunidade ne’e nia apela mós ba lider partidu polítika hotu atu hato’o mensajen ne’ebé nakonu ho edukativu no solidaridade hodi orienta militante partidu polítika ida-ida ba komunga prinsípiu no valór sira-ne’ebé lori povu ba moris di’ak.
“Ami alerta ba ukun-na’in sira, lider sira no sira-ne’ebé besik katuas sira, atu hato’o imi-nia mensajen ne’ebé nakonu ho edukativu, solidaridade no promove nafatin pás iha Timor-Leste. Ita-nia liafuan sira tenke komunga dame no pás tanba pás mak bele lori dezenvolvimentu ba rai ida ne’e, se ita sukit malu la aprende ho ita-nia pasadu, liu-liu ita-nia relatóriu Chega! Hatuur liafuan lubun ida atu ita labele repete tan aktu sira-ne’ebé husi hela kolonial no invazór sira,” nia hateten
Nia hateten sira kondena makas aktu violentu sira-ne’ebé akontese direta no indireta iha atividade kampaña polítika no hato’o mós solidaridade ba vitima sira-ne’ebé hetan pankada husi asaun tuda malu. No sira husu autoridade seguransa atu labele tolera autór krime sira hodi la fó espasu ba ema seluk atu espresa ema nia direitu sivíl polítika tuir konstitusaun haruka.
Iha parte seluk, Diretór Ezekutivu Forum NGO Timor-Leste (FONGTIL), Valentim da Costa Pinto hateten observasaun sira-nian nota katak envolvimentu labarik minoridade sira-nian iha atividade kampaña polítika barak.
Nia hateten responsabilidade família nian atu fó protesaun ba oan sira tanba lei bandu labarik minoridade sira envolve iha kampaña polítika.
“Loos duni iha situasaun balun família tenke lori oan hodi tuir atividade kampaña, maibé lei la permite katak ita hodi labarik idade minór asiste no kontinua lori ba tuir atividade kampaña sira ne’ebé la’o iha terenu.
Ami hanoin família ida-ida tenke halo jestaun, kuandu situasaun la permite di’ak liu fó prioridade tau matan ba oan sira duke asiste kampaña atu nafatin asegura seguransa no protesaun di’ak ba oan sira,” nia hateten.
Nia husu ba Institutu Nasionál Defesa Direitu ba Labarik (INDDICA) no Komisaun Nasionál Eleisaun (CNE) atu halo supervizaun ba partidu polítika sira-ne’ebé envolve labarik iha kampaña atu fo sansaun rigór ba partidu sira.