- Publika iha: 26 Abril 2023
Prezidente Conselho Nacional Joventude Timor-Leste (CNJTL), Maria Dadi Soares Magno apela ba kamada joventude hotu iha rai-laran no rai-liur atu fó oportunidade rona idiolojia no programa partidu polítiku hotu nian iha períodu kampaña hodi bele hola desizaun hili partidu ne’ebé serve ukun no iha kapasidade halo mudansa ba povu nia moris.
Nia salienta Timor-Leste adopta multipartidária, entaun iha eleisaun parlamentár 2023, iha partidu polítiku 17 mak sei kompete tanba ne’e iha períodu kampaña eleitorál hotu bele rona no eskolla partidu ne’ebé serve tuir ida-ida nia padraun rasik.
“Klaru partidu mai ho idiolojia no programa rasik, maibé ha’u fiar katak ha’u-nia joven sira hatene ona sé mak sira atu hili. Ita bele dehan hili ho rasionalidade, ho materunidade, hili la’ós tanba gosta figura ida, la’ós tanba família. Maibé hili ho responsabilidade katak ida-ne’e merese duni atu halo mudansa ba povu tanba povu terus liu ona, liu-liu joven sira,” nia hateten liuhusi konferénsia imprensa iha edifisiu Farol, Díli.
Nia dehan povu hakarak moris di’ak, signifika moris saudável, moris ho dignu, moris iha justisa sosial, moris iha pás tanba ne’e tempu ona ba povu atu deside fó fiar ba partidu polítiku ida-ne’ebé bele halo mudansa sira-ne’e ba povu nia moris.
Iha oportunidade ne’e nia husu ba lider partidu polítiku sira atu para ona ho insulta malu, trata malu iha palku kampaña polítiku, foku ba hato’o programa sira no apela ba joventude sira hotu atu labele monu ba deklarasaun sira-ne’ebé bele kontribui ba instabilidade.
Iha parte seluk, Diretora Organizasaun Movimentu Feto Foinsa’e Timor-Leste (MOFFE), Yasinta Lujina hateten lider partidu polítiku sira hotu no povu tomak tenke kontinua hatudu maturidade polítika ba mundu kona-ba prosesu eleisaun ne’ebé nakonu ho dame no pás.
“Ha’u hanoin polítiku sira hamrik iha palku leten oinsá aprezenta ita bo’ot sira-nia vizaun, perspetiva, programa ba povu. Aprezenta baut ne’ebé realístiku, katak imi iha kibiit no kapasidade bele halo. Labele halo promesa de’it hodi manan votu,” nia hateten.
Nia dehan atu prosesu kampaña partidu polítiku sira-nian la’o ho di’ak mak orgaun eleitorál, liu-liu CNE tenke hala’o nia funsaun ho efetivu atu superiviziona atividade hotu no foti asaun konkretu hasoru partidu polítiku ne’ebé viola lei eleitorál.