Domingo, Abril 21, 2024
Total visitors: 766366

Diretór Klinika Bairo Pite (KBP), Inacio dos Santos informa sira servisu hamutuk ho unidade nutrisaun iha gabinete presidensiál no grupo suporta inan hala’o atividade screening kazu malnutrisaun ba labarik idade tinan 0 até 7, inan isin-rua no inan fó susu iha suku Bairo Pite no Kampung Alor hodi fó atendimentu ba hadia estadu nutrisaun.

Diretór Klinika Bairo Pite (KBP), Inacio dos Santos informa sira servisu hamutuk ho unidade nutrisaun iha gabinete presidensiál no grupo suporta inan hala’o atividade screening kazu malnutrisaun ba labarik idade tinan 0 até 7, inan isin-rua no inan fó susu iha suku Bairo Pite no Kampung Alor hodi fó atendimentu ba hadia estadu nutrisaun.

“Ita tama sai suku Bairo Pite no Kampung Alor atu deteta kazu sira-ne’e, hodi nutrisionista no profesionál saúde sira tau matan no hato’o proposta ba unidade nutrisaun iha presidensial atu fornese aihan ne’ebé nutritivu ba inan isin-rua, inan fó susu no labarik idade tinan 0 até 7 ne’ebé sofre malnutrisaun,” nia hateten iha servisu fatin Bairo Pite, Díli.

Nia dehan iha atividade screening ne’e-sira deteta inan isin-rua, inan fó susu no labarik na’in 300 resin mak sofre malnutrisaun tanba ne’e integra sira iha programa fó aihan atu sira bele fornesementu aihan nutritivu hodi hadia nutrisaun.

Nia espera programa fó han ne’ebé inisia husi Prezidente Repúblika, José Ramos Horta ne’e bele kontinua atu fornese aihan nutritivu ba grupu vulneravel sira tanba família kib’it laek barak mak enfrenta insufisiente aihan.

Iha parte seluk Asesor Prinsipál Ministériu Agrikultura no Peskas (MAP), Frumêncio Araújo hateten produsaun rai-laran seidauk bele garantia seguransa aihan no nutrisaun populasaun sira nian tanba produsaun seidauk bele kobre nesesidade nasionál.

Nia dehan iha fatór barak ne’ebé kontribui ba produsaun rai-laran menus, hanesan prinsipal liu mak bee tanba bee laiha natar barak sei abandona, produtór sira labele kuda hortikultura, hakiak animal inklui ikan.

“Tuir estudu husi FAO hatudu katak Timor-Leste nia kapasidade konsumu ikan, ema ida konsumu 6,1 kg de’it kada tinan, ne’e sira hela iha parte kosteira. Iha Ermera no Aileu ema ida konsumu ikan entre 2 até 3 kg kada tinan, ne’e hatudu ita-nia nivel konsumu ikan ki’ik loos kompara ho nasaun seluk ema ida konsumu ikan 15 até 20 kg kada tinan,” nia hateten.

Nia hateten ikan ne’e iha proteina ne’ebé aas di’ak ba inan isin-rua no labarik sira konsumu atu labarik sira saudável, produtivu no kreativu.

Nia hatutan governu halo esforsu tomak atu hada’e produsaun ikan bee midar nian, liuhusi estabelese sentru produsaun fini iha munisípiu sira hodi distribui fini ikan ba agrikultór sira hakiak barak liutan iha kada munisípiu hodi responde ba nesesidade munisipál no nasionál ba konsumu ikan hodi kontribui ba mellora nutrisaun inan isin-rua, inan fó susu no labarik sira-nian.