- Publika iha: 07 Março 2023
Diretora Jerál Prestasaun Servisu, iha Ministériu Saúde (MS), Doutora Odete da Silva Viegas informa atividade kampaña nasionál integradu imunizasaun no distribusaun aimoruk vitamina A no albendezole ba labarik idade menus tinan lima susesu tanba 95% labarik sira simu vasina no aimoruk vitamina A inklui albendezole.
Nia salienta atividade ne’e hahú iha loron 12 fulan janeiru to’o loron 28 fulan fevereiru, kuaze munisípiu hotu atinji 100% ba vasina OPV, vasina PCV, vasina sarampu rubella inklui aimoruk vitamina A no albendazole ba prevensaun lumringa.
“Haree ba implementasaun kuaze munisípiu hotu atinji 100%, so hela munisípiu Díli no Likisa mak nia atinjimentu sei menus. Maibé iha loron balun tan ita bele atinji ona alvu ne’ebé mak Ministériu Saúde fó 95%,” nia hateten iha Delta Nova Comoro, Díli.
Nia dehan kobertura iha Díli sei menus kompara ho munisípiu sira seluk tanba Díli populasaun barak no dalabarak profesionál saúde sira to’o iha uma ema laiha ba hotu servisu, entaun fó tan tempu ba sira halo esforsu atu atinji alvu ne’ebé iha.
Nia hateten estratéjia ne’ebé sira aplika iha munisípiu Díli atu hasa’e kobertura vasinasaun no distribusaun aimoruk mak fahe maskuteiru no suplementu ai-han nutritivu inklui halo animasaun ruma atu dada komunidade nia antusiasmu lori oan mai simu vasina no aimoruk.
Tuir dadus nasionál Ministériu Saúde kona-ba kobertura vasinasaun hatudu hahú loron 12 fulan janeiru to’o 28 fevereiru tinan 2023, labarik 161.089 ou 95,7% husi totál alvu 168.263 mak hetan vasina OPV, labarik 155,562 ou 95,4% husi totál alvu 163,027 simu ona vasina PCV, labarik 141,315 ou 92,1% husi totál alvu 146,621mak simu vasina sarampu no rubella, labarik na’in 141,315 ou 92,4% husi totál alvu 152,958 mak simu aimoruk vitamina A no labarik na’in 128,072 ou 92,4% husi totál alvu 5,384 simu aimoruk albendazole.
Iha parte seluk, Xefe Sentru Saúde Vera Cruz, Doutora Marilia Piedade hateten area kobertura sira-nian atinjimentu di’ak tanba kuaze tipu vasina no distribusaun aimoruk atinji 67% no sei kontinua halo esforsu atu atinji meta ne’ebé fó ba munisípiu sira.
“Kampaña integradu hahú dia 12 janeiru to’o 28 fevereiru, ami-nia atinjimentu ba vasina OPV nian labarik na’in 4569 ou 67% husi alvu 6,867, vasina PCV nian labarik na’in 4443 ou 67% husi totál alvu 6,617 mak simu ona, vasina sarampu no rubella labarik na’in 3730 husi totál 5893 mak simu ona. Ba aimoruk vitamina A nian labarik na’in 3905 ou 63% husi totál 6,203 mak simu ona, albendazole iha labarik na’in 3513 ou 63% husi totál 5611 mak simu ona,” nia hateten.
Nia dehan dezafiu ne’ebé ekipa hasoru mak dalabarak liuba família, liu-liu inan-aman sira laiha uma ba hotu servisu, entaun empregada sira labele hola desizaun fó vasina ba labarik sira.