- Publika iha: 01 Março 2023
Reprezentante World Food Programe (WFP) iha Timor-Leste, Cecilia Garzon informa sira apoia tan produtu nutritivu supersereál tonelada 64 ba Timor-Leste, liu-liu Ministériu Saúde atu distribui ba inan isin-rua no inan fó susu iha munisípiu Bobonaro, Aileu no Manufahi.
Nia konsiente intervensaun refere sei la kobre inan isin-rua no inan fó susu hotu, maibé bele fó impaktu balun ba komunidade, liu-liu inan isin-rua no inan fó susu sira.
"Ami hakarak lo'os atu kobre nasaun tomak, maibé ita-nia rekursu mak la to'o. No ami sei husu nafatin ba parseru sira atu suporta ami hodi ami bele hamrik metin kobre nasaun tomak no impaktu bo'ot liutan atu suporta hamenus malnutrisaun iha rai-laran," nia hateten hafoin partisipa iha serimónia lansamentu distribuisaun Supersereál iha salaun SAMES Kampung Alor, Díli.
Nia dehan programa distribuisaun Supersereál ba inan isin-rua no inan fó susu ne'e kobre iha munisípiu hotu, maibé la kobre inan isin-rua no inan fó susu hotu tanba sira-ne’ebé mai fasilidade Saúde mak hetan produtu nutritivu ne'e.
Nia hateten nafatin halo esforsu atu kobre inan isin-rua no inan fó susu hotu iha territóriu nasionál, tanba ho ida-ne'e mak bele hakotu korente malnutrisaun iha rai-laran.
Entretantu, Konseleiru Ekonomia, iha Embaxada Xina iha Timor-Leste, Geng Weixia hateten governu Xina iha komitmentu nafatin atu apoia Timor-Leste atu kombate malnutrisaun iha rai-laran.
"Governu Xina mós iha komitmentu iha futuru atu haree ba edukasaun, saúde, bee moos, liu-liu ba nutrisaun atu nune'e inan sira no labarik sira hetan nutrisaun di’ak iha rai ida-ne'e. Governu Xina nia pozisaun klaru atu hamrik firme nafatin supporta governu Timor-Leste," nia hateten.
Iha parte seluk, Diretóra Ezekutiva Servisu Autonom Medikamentu no Ekipamentu Saúde (SAMES), Santana Martins preokupa ho espasu atu asegura armajena produtu Supersereál ne'e tanba kuantidade boot, kuaze kontentór 32.
"Ita-nia produtu ne’e kuauze kontente 32, mai ita la konsegue armajena iha ne'e. Ita atu lori ba sentru saúde sira mos fatin laiha, entau ita nia esforsu mak ne'e halo jestaun buka apoia husi parseru sira oinsá reforsa ba ita nia distribuisaun," nia hateten.
Nia garantia antes fulan Abril, sira distribui hotu ona produtu ne'e ba fasilidade saúde sira atu bele fahe ba inan isin-rua no inan fó susu sira bele konsumu hodi prevene malnutrisaun ba inan no bebé sira.