PNTL Prosesu Joven Na’in-tolu Ne’ebé Envolve Konfrontasaun Iha Kulu-Hun

Polísia Nasionál Timor-Leste (PNTL) liuhusi Komandu Polísia Munisípiu Díli, halo ona prosesu ba joven na’in-tolu (3) ne’ebé identifikadu envolve direita iha kazu konfrontasaun iha Suku Kulu-Hun Postu Admistrativu Cristo Rei, Munisípiu Díli, ne’ebé rezulta komunidade balun kanek no dormitóriu SDB hetan estragus.

Komandante Polísia Munisípiu Díli Superintendente Xefe Natercia Martins dehan, kazu konfrontasaun ne’e akontese iha loron sábadu dia 12 Fevereiru iha tuku 3:20 dadesan madrugada ne’ebé komete husi joven aldeia rua hanesan, Funu-Hotu no Mui, iha Suku Kulu-Hun.

“Husi konfrontasaun ne’e ita halo prosesu ba joven na’in-tolu husi aldeia rua ne’e tanba identifikadu ona katak sira mak komete direta hodi kria konfrontasaun ne’e,” nia dehan.

Nia dehan, joven na’in-tolu ne’ebé polísia halo prosesu ne’e no inisiál SSM, JCB, no NBC, sira-ne’e hetan kapturasaun iha fatin akontesimentu hafoin konfrontu.

Enkuantu husi akontesimntu ne’e dormitóriu SDB, kapela hetan estragus, kioske, loja, nune’e mós ropa obralan komunidade nian, nune’e mós komunidade balun kanek inklui membru Falintil Forsa Defesa Timor-Leste (F-FDTL) ida ne’ebe hetan kanek grave no evakua ba hospital nasional hodi halo tratamentu.

“Autór prinsipál, sira-ne’e tenke prosesu nune’e sira bele hola resposabilidade ba aktu krime ne’ebé sira komete,” Komandante Martins dehan.

Nia dehan, aleinde halo prosesu ba joven na’in-tolu ne’e komandu mós bolu ona autoridade lokál ho juventude iha suku Kulu-Hun hodi buka solusaun ba konfontusaun ne’e nune’e mós evita labele akontese tan.

Entretantu, Diretór Fundasaun Mahein (FM), Abel Martins, dehan kazu konfrontasaun ne’ebé akontese iha Kulu-Hun ne’e tuir infromasaun katak kleur ona maibé to’o agora seidauk hetan solusaun no foin akontese fali iha sábadu madrugada refere.

“Atu hetan solusaun ba kazu ne’e presiza halo dialogu entre autordade lokál no joven sira, no parte polísia hodi buka loloos huun husi konfrontasuan ne’e nune’e bele solusiona nune’e mós hodi hadame joven iha aldeia rua ne’e nune’e bele prevene sela’e sei akontese nafatin,” nia saliente.

Tanba ne’e nia husu ba parte polísia kria dialogu ho joven sira husu sira-nia ideia atu nune’e bele hetan solusaun, la’ós dialogu ne’e polísia de’it mak ko’alia no la fó tempu ba joven sira atu espresa sira-nia hanoin hodi kria pás estabilidade iha suku laran.