- Publika iha: 02 Fevereiro 2023
Governu kontratu kompañia China Civil Engineering Construction Corporation (CCECC) ho montante orsamentu millaun US$9.3 ba projetu konstrusaun hospital pediatria no unidade kuidadu intensivu (ICU) ho andar lima iha Hospital Nacional Guido Valadares (HNGV), Díli.
Primeru-Ministru Taur Matan Ruak hateten inisiativa ne’e importante no istóriku tebes, ne’ebé enkuadra iha esforsu Ministériu Saúde nian ba vizaun iha futuru, liu-liu master plan ba projetu konstrusaun HNGV no hospital Lahane.
“Ita hotu iha mehi ida de’it, ha’u-nia mehi ida-de’it ha’u nia oan sira uluk moris hotu iha uma ida ne’ebá. Ha’u hakarak ha’u-nia beioan sira moris fali iha uma ne’ebé agora ita harii ne’e, tanba ha’u hanoin tempu ona atu investe iha ita-nia saúde,” nia hateten bainhira partisipa iha serimónia lansamentu fatuk dahuluk ba konstrusaun hospital pediatria iha Bidau, Díli.
Nia rekoñese projetu ne’e lori tempu ne’ebé naruk tinan 12, to’o mai tinan 2023, mak realiza tanba projetu bo’ot tenke mobiliza rekursu barak.
Nia dehan fó ona instrusaun ba ministru finansas atu kontinua mobiliza rekursu finanseiru ba ministériu saúde, liu-liu HNGV tanba projetu ida-ne’e prioridade atu fó kondisaun ne’ebé dignu ba profesionál saúde sira halo servisu atendimentu saúde ba komunidade.
“Totál investimentu kuaze atinji millaun $250 dolar amerikanu, pergunta ita iha osan ka la’e? Ita iha osan. Bainhira ita halo auto-estrada iha Suai kada kilometru kustu U$10 ate U$11 miloens dolar amerikanu tanba sa laiha osan halo hospital ne’ebé iha kondisaun para simu ita-nia pasiente sira,” nia haktuir.
Primeru-Ministru mós husu ba kompañia CCECC atu halo esforsu kumpri kontratu, liu-liu prazu tinan rua konklui ho infrastrutura ne’ebé kaulidade aas.
Enkuantu, Ministra Saúde, Doutóra Odete Maria Freitas Belo hateten tempu ona atu moderniza infrastrutura saúde, hahu ho master plan HNGV nian atu bele fó espasu ne’ebé dignu ba profesionál saúde sira halo servisu atendimentu kuidadu saúde ba povu, liu-liu bebé no labarik sira.
“Ami kontente ho lansamentu ida-ne’e tanba prosesu ida-ne’e lori tempu naruk tebes komesa husi tinan 2012, ita haree katak ohin ita realiza baut ruma pelumenus ita inisia ona,” nia hateten.
Nia dehan infrastrutrua ne’e harii iha rai ho medida 4300 metru², ne’ebé sei iha kama hamutuk 327.
Iha parte seluk, Diretór kompañia CCECC, Liang Quing komprometidu atu finaliza projetu ida-ne’e tuir prazu ne’ebé determina ona ho kualidade ne’ebé aas ba governu no povu Timor-Leste.
“Ami kompremetidu atu finaliza projetu ida-ne’e ho infrastrutura ida kualidade aas ba governu no povu Timor-Leste,” nia hateten.
Nia dehan ekipamentu no materiál sira ba konstrusaun hospitál nian iha ona dalan mai Timor-Leste.