Sexta, Março 01, 2024
Total visitors: 766366

Governu liuhusi Ministériu Saúde (MS) ho apoia husi parseru dezenvolvimentu sira lansa simultaneamente Kampaña Nasionál Integradu Imunizasaun no distribuisaun vitamina A no Albendazole ba labarik sira tinan lima mai kraik iha territóriu nasionál.

Ministra MS, Doutora Odete Maria Freitas Belo, hateten vasina ne’ebé sei fó ba labarik sira mak vasina kontra moras sarampu no rubella.

Ministra MS, Doutora Odete Maria Freitas Belo, hateten vasina ne’ebé sei fó ba labarik sira mak vasina kontra moras sarampu no rubella, moras polio no introdús vasina pneumoccal ba prevensaun moras pneumonia, no distribui mós vitamina A no Aimoruk Albendazole ba prevensaun moras lumbringa.

"Iha tinan 2022, Timor-Leste konsegue atinji media 77% husi taxa vasinasaun kompleta ba labarik sira tinan lima mai kraik. Munisípiu 4 atinji menus husi 70%, signifika ita-nia labarik pelumenus 20% mak seidauk vasinadu, ho nune'e ha’u hakarak agradese ba inan-aman sira durante ne'e esforsu aan lori oan sira ba simu vasina rutina iha tempu ne’ebé loos," nia hateten iha serimónia kampaña vasinasaun iha Suku Tapomemo, Postu Administrativu Maliana, Munisípiu Bobonaro.

Nia dehan alende vasinasaun ba labarik sira tinan lima mai kraik, fó mós vasinasaun Covid-19 ba labarik sira idade 12 ba leten no komunidade sira ne’ebé seidauk vasina.

Nia hatutan implementasaun vasinasaun ne'e sei hala’o durante fulan ida semana rua, hahú loron 12 Janeiru too loron 28 Fevereiru tinan 2023.

Nia haktuir iha territóriu tomak postu vasinasaun hamutuk 2586 no totál labarik idade menus tinan lima hamutuk 186558.

Iha parte seluk, Reprezentante Organizasaun Mundial Saúde (OMS) iha Timor-Leste, Doutór Arvind Mathur hateten esforsu koletiva ne’ebé halo iha tinan 2018, Timor-Leste nia koobertura vasina sarampu no rubella atinji 98%, tanba ne'e Timor-Leste hetan sertifikasaun husi OMS ba esforsu elemina moras sarampu no Kontrola Moras rubella. Maibé iha períodu Covid-19 labarik 24% la konsegue simu vasina no laboratóriu konfirma kazu foun sarampu no rubella iha tinan 2020.

Nia dehan kampaña ne'e importante tebes atu kompleta fali lakuna vasinasaun no kobre fali labarik sira ne’ebé seidauk simu vasina.

"Husik ha’u reafirma katak kampana sei kontribui makaas ba labarik sira-nia saúde no moris di’ak no tuir ita-nia vizaun timoroan saudável iha Timor-Leste ne’ebé saudável. No nu’udar parseiru ne’ebé ita fiar no durasaun servisu ne’ebé naruk ho Ministériu Saúde no Povu Timor-Leste, OMS kompremitidu atu habelar asisténsia téknika sientífika no asaun ne’ebé di’ak liu no la’o hamutuk ho ita bo'ot sira kada pasu iha viajen ne'e," nia hateten.

Iha parte seluk, inan Julieta Araujo hateten durante ne'e nia oan la hetan moras sériu ruma tanba hetan vasina kompletu.

"Husu ba inan sira lalika tauk atu lori oan sira mai simu vasina tanba vasina di’ak ba ita-nia oan sira," nia hateten.