Sexta, Março 01, 2024
Total visitors: 766366

Ministru Edukasaun Joventude Desportu (MEJD), Armindo Maia hato’o agradesementu ba UNICEF ne’ebé apoia ona fundu hodi harii fasilidade rampa no haris-fatin ne’ebé asesível ba Ema ho Defisiénsia (EhD) iha eskritóriu Sekretáriu Estadu Joventude no Desportu (SEJD) hodi asegura foinsa’e no adolesente ho defisiénsia bele asesu no partisipa iha atividade sira iha fatin refere.

Ministru Edukasaun Joventude Desportu (MEJD), Armindo Maia hato’o agradesementu ba UNICEF ne’ebé apoia ona fundu hodi harii fasilidade rampa no haris-fatin ne’ebé asesível ba Ema ho Defisiénsia (EhD) iha eskritóriu Sekretáriu Estadu Joventude no Desportu (SEJD).

Ministru salienta dadaun ne’e úniku SEJD mak edifísiu públiku ho iha fasilidade ne’ebé inkluzivu katak ema ho defisénsia sira bele asesu ho di’ak ba fatin sira ne’ebé durante ne’e sira iha difikuldade hanesan sala enkontru, haris-fatin, kampu desportu sira.

“Ha’u hein katak konstrusaun fatin asesibilidade iha SEJD ne’e, sei inspira no enkoraja institusaun sira seluk tantu públiku no privadu atu bele kontempla ba garantia asesibilidade iha sira-nia fasilidade sira ba ita-nia foinsa’e no adolesente no ema sira ho defisiénsia,” nia hateten bainhira partisipa iha serimónia inagurasaun fatin asesibilidade ba ema ho defisiénsia iha SEJD Lecidere, Díli.

Nia hateten governu garantia edifísiu publiku inklui eskola foun sira ne’ebé atu konstrui iha fasilidade asesivel ba ema ho defisiénsia sira no edifísiu balun komesa konstrui ona rampa atu ema ho defisiénsia fisiku sira bele liu ho kadeira roda.

Nia informa Orsamentu Jerál Estadu 2022, aloka de’it rihun $45 ba edukasaun inkluzivu.Maibé iha orsamentu fiskál 2023, aloka ona $900,000 ba edukasaun inklusivu atu mellora kondisaun no fasilidade iha sentru rekursu ne’ebé estabelese ona iha munisípiu, formasaun ba profesór sira atu tulun estudante sira ho defisiénsia durante prosesu aprendizajen iha aula.

Iha parte seluk, Reprezentante UNICEF, iha Timor-Leste, Bilal Zeb Aurang Durrani hateten UNICEF nia mandatu atu promove direitu labarik sira-nian husi idade 0 to’o 18, maibé sira mós ko’alia makaas ba direitu foinsa’e no adolesente sira-nian, liu-liu sira ho defisiénsia.

Nia dehan sira nia foku mak asesibilidade ema ho defisiénsia nian ba eskola no fasilidade saúde. No kontinua hasa’e konsensia publika kona-ba direitu ema ho defisiénsia nian atu redús stigma no diskriminasaun iha sosiedade atu garantia ema ho defisiénsia nia partisipasaun iha prosesu dezenvolvimentu.

“Ita hakarak estabelese fasilidade asesibilidade ida-ne’e primeiru atu hatudu ezemplu no prátika di’ak oinsá governu garantia edifísiu públiku sira bele asesível ba ema ho defisiénsia,” nia hateten.

Nia informa konstrusaun fasilidade rampa no haris-fatin asesível ba feto no mane ne’e gasta orsamentu purvolta $30,000 dolar amerikanu.