Sexta, Março 01, 2024
Total visitors: 766366

Governu Tailándia servisu hamutuk ho Sekretáriu Estadu Juventude no Desportu (SEJD) hodi dezenvolve modalidade Muay Thai iha Timor-Leste hodi fasilita joven sira ne’ebé mak envolve an iha arte marsiais.

Governu Tailándia servisu hamutuk ho Sekretáriu Estadu Juventude no Desportu (SEJD) hodi dezenvolve modalidade Muay Thai iha Timor-Leste.

Sekretáriu Estadu Juventude no Desportu (SEJD) Abrão Saldanha Nokosiko dehan, modalidade Muay Thai ne’e mai husi Tailándia no di’ak tebes hodi ajuda joven sira ne’ebé envolve iha area marsiais bele compete liu husi jogu sira iha modalidade refere.

“Ita sente katak modalidade Muay Thai ne’e banhira dezenvolve iha Timor-Leste ajuda tebes ita-nia joven sira ne’ebé mak envolve iha arte marsiais nune’e bele compete iha nível internasionál,” SEJD Nokosiko dehan.

Nia dehan, modalidade Muay Thai ne’e bo’ot tebes no husi embaxada mak lori treinadór na’in-rua husi Tailándia mai hodi asisténsia no treinu iha modalidade refere iha Timor-Leste.

“Objetivu hodi dezenvolve ita-nia joven sira ne’ebé mak envolve an iha arte marsiais, oin-oin ne’ebé eziste iha Timor-Leste, sira bele prátika husi jogu Muay Thai ne’e,” nia salienta iha Licedere, Díli.

Tanba ne’e SEJD konsidera nu’udar oportunidade di’ak atu dezenvolve foinsa’e sira ne’ebé gosta halo problema sira ne’e bele tama iha jogu sira hanesan ne’e atu bele espresa sira-nia talentu.

Iha fatin hanesan Embaxadór Tailándia nian iha Timor-Leste, Ekapoo lPoolpipat dehan, kooperasaun ne’ebé realiza kona-ba ezisténsia no dezenvolvimentu Muay Thai iha Timor-Leste.

“Iha tempu badak ita sei halo demonstrasaun kona-ba modalidade Muay Thai hodi atrai joventude sira, nune’e bele partisipa másimu hodi dezenvolve ne’e iha Timor-Leste,” Embaxadór Poolpipat dehan.

Nia dehan, hodia akumula joven sira ne’ebé prátika arte marsiais maské diferente maibé bele akumula hamutuk sira hodi kompete iha modalidade Muay Thai ne’e, nune’e bele reprezenta Timor-Leste hodi compete iha eventu rejional, nomós internasionál.