Quinta, Dezembro 08, 2022
Total visitors: 692025

Reprezentante UNICEF nian, iha Timor-Leste, Bilal Aurang Zeb Durrani hateten traballu infantíl kestaun ne’ebé sériu ba labarik sira iha Timor-Leste, tanba lori labarik sira hetan konsekuénsia ne’ebé perigu ba sira-nia saúde no sira-nia moris.

Reprezentante UNICEF nian, iha Timor-Leste, Bilal Aurang Zeb Durrani hateten traballu infantíl kestaun ne’ebé sériu ba labarik sira iha Timor-Leste.

Nia salienta labarik balun hetan konsekuénsia grave to’o lakon vida iha luron ninin, tanba hetan asidente tráfiku, governu tenke foti ona asaun sériu hodi prevene no protese labarik sira husi servisu perigu sira.

“Ha’u hanoin primeiru importante ba governu atu aprova lalais no implementa planu asaun nasionál ba eleminasaun traballu infantíl. Implementasaun signifika governu tneke aloka rekursu ne’ebé adekuadu ba liña ministériu sira atu implementa programa sira ne’ebé aprova ona iha planu asaun nasionál, ne’e mak importante tebes,” nia hateten iha Sentru Konvensaun Díli.

Nia dehan UNICEF servisu besik ho Institutu Para a Defeza dos Direitus da Crianças (INDDICA) no Komisaun Nasionál Kombate Traballu Infantíl dezenvolve ona esbosu planu asaun nasionál, maibé sei iha Ministériu Turizmu, Komérsiu no Indústria (MTCI) seidauk hetan aprovasaun.

Reprezentante UNICEF nian hateten tinan kotuk 2021, UNICEF no International Labor Organization (ILO) hamutuk ho parseru halo ona peskiza kualitativu atu hatene kauza husi tipu traballu infantíl iha Timor-Leste.

“No rezultadu hatudu traballu infantíl ne’e manifestasaun ou rezultadu ida husi problema sira seluk, liu-liu populasaun ne’ebé 42% sei moris iha liña pobreza. Situasaun ida ne’e limita duni labarik sira-nia asesu ba edukasaun, saúde no família sira obriga labarik sira envolve an iha traballu infantile”, reforsa tan.

Iha parte seluk, Komunidade Leonor de Jesus hateten governu tenke intensifika programa asisténsia sosiál sira ba família kbi’it laek sira, ho nune’e bele kontribui ba elemina númeru traballu infantíl.

“Ita hateten labarik sira labele faan sasan, maibé baut ne’e akontese, tanba inan-aman kbi’it laiha atu haree. Inan-aman balun moras labele ba faan, entaun oan mak ba faan hodi hetan rendimentu ba uma laran,” nia hateten.

Nia hatutan situasaun atuál família abandonadu barak, liu-liu inan faluk sira ne’ebé ho oan barak hakarak ka lakohi tenke servisu buka rasik osan hodi sustenta família.

Tuir dadus peskiza tinan 2016, hatudu labarik idade tinan 5 até 17, iha Timor-Leste hamutuk na’in 52,651 ou 12.5% envolve iha servisu setór informál nian. Husi totál 52,651 ne’e labarik na’in 19,195 mak envolve iha servisu perigozu ba vida, katak prejudika sira-nia dezenvolvimentu fíziku, mentál, saúde no morál.