- Publika iha: 21 Setembro 2022
Ministeriu Saúde (MS) servisu hamutuk ho organizasaun Fundasaun Alola (FA) fasilita formasaun ba voluntariu Grupo Suporta Inan (GSI) iha 36 sukus iha Munisipiu Dili, konaba matadalan akonsellamentu fo hahan ba bebe no labarik ki’ik sira atu akonsella no ajuda inan sira fo hahan optimal ba bebe no labarik ki’ik sira.
Fasilitador Grupo Suporta Inan, iha Fundasaun Alola, Adalzijah Menezes hateten matadalan ne’e koalia konaba akonsellamentu fo susu ba bebe, fo hahan komplementar labarik ki’ik sira, fo susu no hahan ba bebe iha situasaun espesial, liu-liu inan sira ne’ebe sofre moras infeksioza hanesan HIV. Alende ne’e oinsa halo screening nutrisaun no kuidadu esensial ba saúde inan-oan, imunizasaun inklui pratika saneamentu no ijiene.
“Ita tenke fo formasaun ne’ebe klaru ba sira tanba maioria iha ita nia komunidade sira fo hahan artificial sedu ba sira nia bebe, tanba sira menus konhesementu oinsa atu fo hahan optimal ba sira nia bebe no labarik ki’ik sira. Entau husi formasaun ne’e atu fo hanoin fali no kapasita sira atu sira rasik mak hato’o tutan informasaun sira ne’e ba sira nia komunidade,” nia hateten bainhira partisipa iha aktividade formasaun iha sede suku Caicoli, Dili.
Nia hateten aihan optimal ba bebe no labarik sira mak bebe foin moris idade 0 to’o fulan nen fo deit susuben inan nian laiha tan aihan seluk, bebe idade fulan nen ba leten kontinua fo susu no akompaña ho aihan komplementar sira, katak aihan ne’ebe iha balansu nutrisaun ba labarik sira.
Nia hatutan voluntariu GSI ne’e integra iha sistema Ministeriu Saúde nian, entau governu mak iha responsabilidade atu garantia sira nia performansia servisu iha komunidade, liu-liu servisu kuidadu saúde primaria.
Iha parte seluk, Xefe Suku Caicoli, Postu Administrativu Vera Cruz, Munisipiu Dili, Hipolito Marques Sarmento hateten sira iha kordenasaun servisu ne’ebe diak tebes ho Miniteriu Saúde no Fundasaun Alola atu eleva konhesementu no abilidade voluntariu GSI nian hodi hamutuk haforsa servisu kuidadu saúde primaria, liu-liu kuidadu esensial ba saúde inan no oan.
“Formasaun sira ne’e beibeik ona atu fo informasaun ba ita nia joven sira iha ne’e, nune’e ekipa saúde tun mai sira mak lao hamutuk ba kontrola no fo akonsellamentu ba komunidade sira atu isin rua tenke ba konsulta, tenke partu iha fasilidade saúde, tenke lori oan sira ba simu vasina no fo susu ba bebe labele fo susubeen seluk ba bebe tanba susuben inan nian mak importante,” nia hateten.
Nia konsente inan barak mak la fo susu sira nia bebe sosa susuben seluk fo ba sira nia bebe, ne’ebe fo impaktu ladiak ba sira nia saúde rasik no bebe nia kondisaun saúde tanba ne’e presiza akonsella beibeik familia, liu-liu inan sira atu fo susu deit bebe no fo aihan ne’ebe nutritivu ba labarik sira.