- Publika iha: 08 Setembro 2022
Impresario Bella Galhos rekomenda ba governu atu rejistu Timor-Leste iha Adsense no enkoraja joventude sira ne’ebe iha kreatividade atu sai YouTuber tanba plataforma YouTube sai ona oportunidade kampu servisu ne’ebe bo’ot ba foinsa’e sira iha era digitalizasaun.
Nia dehan governu kria programa kompetisaun ba konten creator, maibe atu halo ida ne’e sai hanesan kampu servisu ida ba joven sira ne’ebe iha kreatividade tenke rejistu iha Adsense atu sira nia produtu ne’e hetan pagamentu hodi garantia sustentabilidade.
“Timor ema labele sai YouTuber tanba Timor laiha Adsense. Ita la rejistu ita nia nasaun iha Adsense, ita nia foinsa’e balun ba iha nasaun seluk hodi rejistu nudar YouTuber, hau rasik halo ida ne’e hau ba iha Australia,” nia hateten bainhira sai panelista iha The Dili Dialogue Forum 2022, ho tema Media Challenges in Timor-Leste and Southeast Asia, iha salaun CNE Colmera, Dili.
Nia hateten joventude sira iha rai ida ne’e barak iha kapasidade no kreatividade, maibe oportunidade no rekursu ba sira atu dezenvolve aan laiha.
Iha parte seluk, Sekretariu Estadu Comunikasaun Sosial (SECOMS), Mericio Juvinal dos Reis hateten tinan ida liu ba governu kria kompetisaun YouTube atu motiva joven sira sai konten creator ne’ebe diak no profesional.
“Ita mos hakarak enkoraja joven sira, feto no mane partisipa iha kompetisaun YouTuber sai konten creator. Ita presiza konten creator barak atu eduka no sai agente edukasaun ba ita nia sidadaun sira,” nia hateten.
Nia rekonhese Timor-Leste seidauk rejistu entau atu sai YouTuber tenke ba rai liur tanba governu seidauk iha kapasidade atu rejistu.
Nia hateten politika governu nian mak kontinua halo edukasaun sivika ba populasaun konaba literasia digital atu sensibiliza sosiedade sai sosiedade ne’ebe matenek uza smartphone.