Joven Feto Nain 9 Sai Vensedor Ba Premiu Emprezarial

Emprezaria foinsa’e nain 9 husi total partisipante nain 30 mak sai vensedor ba premiu emprezarial dahuluk tinan 2022, ne’ebe organiza husi Cãmara do Comércio e Indústria Timor-Leste (CCI-TL) ho apoia husi embaxador Estado Unidus Amerika iha Timor-Leste.

Diretur Ezekutivu CCI-TL, Rui Pacheco hateten antes partisipa iha kompetetisaun partisipante sira ne’e hetan uluk formasaun durante fulan nen konaba empreendedorismu nian hodi motiva no eleva sira nia kapasidade no abilidade atu hahu negosiu.

“Fo mos oportunidade ba ita nia maluk feto sira pratika buat ne’ebe sira aprende iha sira nia vida emprezarial no atividade ekonomika ne’ebe sira halo maioria sira partisipa kursu ne’e maluk feto balun iha tiha ona sira nia empreza ki’ik sira ne’ebe los deit inisiu, maibe ema ne’ebe iha tiha ona negosiu ki’ik,” nia hateten hafoin partisipa iha serimonia atribuisaun premiu emprezarial 2022, iha Acait, Dili.

Nia dehan premiu ne’e iha kategoria tolu mak kategoria faze ideia negosiu, primeru lugar hetan $1,000 dolar Amerika, segundu lugar hetan $800 dolar Amerika, terseru lugar $600 dolar Amerika. Premiu kategoria up business, ba primeru lugar hetan $1,500 dolar Amerika, segundu lugar hetan $1,000 dolar Amerika, terseru lugar hetan $600 dolar Amerika. Premiu kategoria existing business ba primeru lugal hetan $2,000 dolar Amerika, segundu lugar hetan $1,500 dolar Amerika, terseru lugar hetan $1,000 dolar Amerika.

Nia hatutan CCI-TL nia odamatan nakloke atu apoia sidadaun sira, liu-liu joven feto no mane ne’ebe hakarak no iha vontade tama iha vida emprezarial hodi hamutuk dezenvolve no hametin ekonomia rai laran.

Enkuantu, Manan Nain Elsa da Costa Soares hato’o agradese ba CCI-TL no parseru sira ne’ebe apoia ona programa formasaun no kompetisaun hodi fo oportunidade ba joven feto sira partisipa no hakbi’it halo buat ruma kontribui ba dezenvolvimentu ekonomia rai laran.

“Hau bele dehan katak antes ne’e ami sei iha frakeza barak. Ba hau privadu sente iha frakeza bainhira hahu hau nia atividade negosiu, hau difisil tebes iha jestaun finanseiru no marketing tanba ne’e liu husi formasaun ida ne’e hau aprende halo jestaun ba finanseru, marketing no hau mos hahu iha ideia negosiu foun,” nia hateten.

Nia dehan nia negosiu halai liu ba kulinaria, liu-liu halo sei karau, fahi, surisu timor, aimanas derok, no sira mos loke ona mini restornate ida hodi responde ba demanda ne’ebe aumenta.

Iha parte seluk, Public Affairs Officer, iha Embaixada Estado Unidus Amerika, Timothy Johnson hateten sira iha koperasaun servisu diak tebes ho CCI-TL atu kontinua fo apoia ba feto emprezarial sira hodi dezenvolve atividade ekonomika ne’ebe sira halao ona.

“Liu husi programa ida ne’e hau espera imi aprende barak no agora imi tau iha pratika saida mak imi aprende, no fila fali ba halo mudansa iha imi nia komunidade,” nia hateten.