Quinta, Dezembro 08, 2022
Total visitors: 692025

Ministra da Saúde, Doutora Odete Maria Freitas Belo hateten kampanha vasinasaun Covid-19 ba labarik idade tinan 12 ate 17 hahu semana oin iha munisipiu Dili no Liquiçá tanba numeru populasaun elijivel bo’ot.

Ministra da Saúde, Doutora Odete Maria Freitas Belo hateten kampanha vasinasaun Covid-19 ba labarik idade tinan 12 ate 17 hahu semana oin iha munisipiu Dili no Liquiçá tanba numeru populasaun elijivel bo’ot.

Nia dehan sira sei halo esforsu atu administra uluk vasina Pfizer doasaun husi governu Amerika ho kuantidade 100,620 iha munisipiu rua, liu-liu ba labarik eskola sira hodi hein mos apoia sira seluk mai tan atu kobre labarik sira iha teritorio tomak.

“Graça Deus ita nia governu no parseru hanoin nafatin labarik sira ne’ebe sai mos risku ba Covid-19 ne’ebe loas ona orijien, maibe mai ho variante diferente ataka mos labarik ki’ik sira. Entau ita tau matan nafatin ba labarik ki’ik sira tanba moras ne’e kada tempu muda aan no ita lakohi labarik sira mate,” nia hateten hafoin partisipa iha serimonia entrega vasina Pfizer husi governu Amerika ba Timor-Leste iha armajen sentral Kampung Alor, Dili.

Nia konsente moras Covid-19 ne’e hanesan mos moras Infesaun Respiratorio Aguda (IRA) ne’ebe domina iha fasilidade saúde hotu, maibe Covid-19 bele oho ema iha tempu badak no lori ema ba toba iha hospital ho tempu ne’ebe kleur, liu-liu sira ne’ebe ho moras hanesan malnutrisaun tanba ne’e enkoraja inan aman sira atu konvense oan sira simu vasina.

Nia hateten vasina Pfizer ne’e seguru no 100% efetivu atu proteje labarik sira husi infesaun Covid-19 ho nia variante sira seluk tanba ne’e husu inan aman sira atu autoriza oan sira simu vasina.

Entretantu, Reprejentante UNICEF iha Timor-Leste, Bilal Durrani hato’o agradese ba governu Amerika nia solidaridade bo’ot hodi halo doasaun vasina Pfizer ba Timor-Leste no kolaborasaun ba preparasaun tomak hodi implementa kampanha vasina ba labarik sira.

Nia konsente pandemia lori dezafiu oioin ne’ebe afeta aspetu barak ba labarik sira nia moris hahu husi sira nia saúde mental to’o lakon oportunidade iha prosesu aprendizajen tanba prolongamentu taka eskola sira.

“Hau hakarak re-afirma fali UNICEF nia kompromisiu atu servisu hodi bele ajuda alin sira hasoru dezafiu sira ne’e. Ami sei la para atu kontinua fo apoia inisiativa sira ne’ebe mak sei benefisia imi hotu. Ami sei kontinua fo apoia atu hadia asesu ba servisu saúde sira no kualidade aprendizajen, psikolojia no servisu mental sira, prevensaun malnutrisaun, hadia asesu ba bee, saneamentu no ijiene no halo advokasia ba politika sira ne’ebe mak sei proteje imi tomak,” nia hateten.

Iha parte seluk, Enkaregadu Estadus Unidus iha Timor-Leste, Tom Daley hateten governu Estado Unidus aloka osan $4 billaun ba COVAX Facility hodi fasilita asesu global ba vasina sira, inklui Timor-Leste.

“Vasina hira ne’e sei proteje labarik besik 48,000 iha Timor-Leste hasoru efeitu sira aat liu husi Covid-19. Hein katak ho vasina ne’e sei lori normalidade ba ema timor oan sira hotu,” nia hateten.

Nia dehan sira servisu hamutuk ho parseru sira apoia governu no sosiedade sivil fornese asistensia ne’ebe kritiku ho valor osan $5 miliaun hodi kombate Covid-19, liu-liu haforsa kampanha vasinasaun iha area rural sira, estabelese fatin saneamentu baziku no harii sala izolamentu iha munisipiu balun.