Governu Orienta UPF Kontrola Movimentu Ilegal Arte Marsiais Iha Fronteira

Governu liu husi Ministeriu Interior orienta Unidade Patrulhamentu Fronteira (UPF) atu kontrola movimentu ilegal grupos arte marsiais iha fronteira.

Ministru Interior (MI), Antonio Armindo hateten movimentu ilegal iha fronteira ne’e sai amiasa ba importasaun variante foun covid-19, no nia salienta katak karik sidadaun Timor atu halo movimentu tenke liu husi dala legal nune’e governu bele kontrola.

“Ita orienta ona Unidade Patrulhamentu Fronteira (UPF) nune’e mos Polisia Militar atu asegura metin fronteira husi movimentu ilegal arte marsiais sira ne’ebe mak hakat liu fonteira hodi juramentu iha nasaun vizinhu Indonesia,” Vice MI Armindo hateten.

Nia dehan, foin lalais ne’e Tentara Nasional Indonezia (TNI) no Polisia Republika Indonezia (POLRI) kaptura no deporta fila ona membru arte marsiais hamutuk 14 ne’ebe mak hakat liu fronteira liu husi dalan ilegal hodi ba Atambua.

“Sidadaun nain 14 ne’e deporta fila ona ba Polisia Migrasaun, iha Mota- Ain Batugade,” nia informa.

Nia dehan, oras ne’e dadaun Unidade Patrolimentu Fronteira (UPF) no FALINTIL Forsa Defesa Timor-Leste (F-FDTL) liu husi Unidade Polisia Militar (UPM) halo ona prosesu identifikasaun no kuntinua submete ba kuarentena iha Batugade.

Entretantu Komandante Unidade Patrolimentu Fronteira UPF, Superientendente Euclides Belo hateten, sidadaun nain 14 ne’ebe mak atravesa liu fronteira husi dalan ilegal ne’e tuir rezultadu identifikasaun sidadaun hirak ne’e hanesan membru grupu arte marsiais Persaudaraan Setia Hati Terate (PSHT).

“Iha prosesu investigasaun ne’ebe ita halo sidadaun naton 14 ne’e origem husi Munisipiu Ermera Glenu, sira nia objetivu hakat liu fronteria atu ba sa’e sintu iha Atambua,” Komandante UPF Belo hateten.

Nia dehan, sidadaun hirak ne’e katak liu fronteira iha Suku Saburai, Postu Admistrativu Maliana, Munisipiu Bobonaru.

Nia dehan, dadaun ne’e Unidade Patrolimentu Froteira kordena ona ho Unidade Polisia Militar no Komandu Polisia Munisipiu Bobonaru hodi kontrola movimentu ilegal iha fronteira hodi halo prevensaun ba transmisaun variante foun virus covid-19 nian.