- Publika iha: 05 Julho 2021
Komisaun Nasional Direitu Labarik (KNDL) identifika ona labarik minoridade nain 300 mak abandona eskola hodi halo akividade faan sasan iha fatin publiku.
Komisaria KNDL, Dinorah Granadeiro hateten labarik menoridade ne'ebe mak inan aman haruka halo servisu hanesan faan sasan iha fatin publiku hodi apoiu ekonomia uma laran ne'e, sira kontra ona direitu labarik sira nian.
"Labarik hahu husi idade 12 tun mai kraik ne'e, inan aman labele haruka sira halo servisu, tanba sira iha direitu atu estuda no halimar, se haruka servisu ne'e krimi, tenke prosesa," Komisaris KNDL Granadeiro hateten iha servisu fatin, Kaikoli, Dili.
Tanba ne'e nia dehan, tuir dados ne'e KNDL identifika katak total labarik nain 300 refere faan sasan iha fatin publiku sira inklui jardim, merkadu no terminal sira iha kapital Dili laran.
"Husi labarik nain 300 ne'e barak liu husi Rejiaun Admistrativu Espesial Oecusse-Ambeno kuaze 45%, seluk husi Aileu, Ermera no Baucau," nia hateten.
Alende ne'e nia degan, ba inan aman sira ne'ebe mak haruka labarik menoridade halo servisu ne'e balun identifika no halo ona karta xamada, se karik kontra no halo nafatin KNDL sei intrega ba ministeriu publiku nune'ebe halo prosesu tuir lei kodigo penal nian konaba viola direitu labarik nian.
"Tanba ne'e ita husu ba inan aman sira, atu kuidadu didiak sira nian oan ho idade 12 anos tun mai kraik ne'ebe lei balun hatetet sira labele halo servisu no sira nia servisu mak estuda," nia salienta.
Entretantu, Membru Parlamentu Nasional, Deputadu Mariano Asnami Sabino, hateten iha fatin publiku sira iha Dili laran ne'e maioria labarik minoridade sira mak halo sira nia aktividade faan mantolun, has, forerai no buat seluk tan hodi tulun inan aman sira.
"Aktividade ne'ebe sira halo ne'e diak maibe iha lei trabalho infantil la fo dalan ba labarik menoridade atu halo servisu iha loron ida tomak, tenke fo tempo ba sira halimar no estuda," Deputadu Asnami hateten.
Nia dehan, iha lei trabalho infantil ne'e autoriza labarik ho idade 13 mak bele servisu maibe durasaun ne'e oras 4 deit laos loron ida tomak.
"Ita husu ba governu atu bele halo intervensaun ruma ba inan aman sira ne'ebe mak la iha responsabilidade hodi haruka labarik menoridade sira halo servisu no abandona eskola," nia dehan.
Alende ne'e nia dehan, husu ba governu tenke implementa lei protesaun labarik ne'e ho lolos nune'e bele aplika sansaun ba inan aman sira ne'e mak haruka labarik halo servisu iha fatin publiku sira.