Sábado, Março 06, 2021
Total visitors: 551764

Sekretario Estadu Sekretaria Estado Ambiente (SEA), Demetrio do Amaral de Carvalho hateten papel brigada ambiental nian atu servisu hamutuk ho joven sira iha suku laran hodi dezemina informasaun ba komunidade sira kona ba importansia floresta ba ema nia moris tanba floresta barak hetan estragus husi atividade komunidade nian.

Sekretario Estadu Sekretaria Estado Ambiente (SEA), Demetrio do Amaral de Carvalho hateten papel brigada ambiental nian atu servisu hamutuk ho joven sira iha suku laran hodi dezemina informasaun ba komunidade sira kona ba importansia floresta ba ema nia moris.

Nia dehan, sira fo ona formasaun ba joventude brigada ambiental hamutuk nain 300, ne’ebe sei hahu halao asaun vijilansia ambiental iha foho leten sira hodi hamenus atividade tesi ai no sunu rai, no eduka ema atu labele estraga floresta.

“Ami halo treinamentu ba sira fo informasaun ba sira atu sira mak sai hanesan liña frente dezemina informasaun sira ba grupo komunidade sira. No iha futuru ami hanoin entre sira ita sei fo intensivu atu halo vijilansia ambiental iha fatin sira ne’ebe ahi han beibeik,” nia hateten iha servisu fatin Bebora, Dili.

Nia agradese ba joventude sira ne’ebe ho voluntariamente involve aan iha brigada ambiental hodi mobilize komunidade sira partisipa iha asaun protesaun ambiente iha rai laran.

Iha oportunidade ne’e, nia enkoraja populasaun hotu ne’ebe hare aktu krime hasoru ambiente hanesan tesi ai, sunu rai no oho animal fuik sira bele hato’o keixa ba autoridade kompotente atu bele prosesu tanba kodigu penal artigu 215 no 221 kriminaliza aktu ida ne’e.

Nia hateten, krime ambiente ne’e krime publiku tanba ne’e se deit mak hare bele hato’o keixa, no ema tenke brani halo keixa hasoru ema ne’ebe estraga ambiente. Tanba ho ida ne’e mak bele protese ambiente.

Nia informa, sira prosesu ona kazu krime ambiente hanesan kaer no faan animal fuik protesidu sira, maibe la barak tanba sosiedade seidauk brani hato’o keixa.

Iha parte seluk, Chefe do Suco Caicoli, Postu Administrativu Vera Cruz Munsipio Dili, Hipolito Marques hateten joventude iha bairo refere prontu atu kolabora no partisipa iha atividade asaun protesaun ba ambiente, ne’ebe governu introdus iha nivel kraik.

Nia dehan ambiente rai laran hetan impaktu bo’ot husi lixu plastiku sira tanba lixu plastiku naklekar iha foho leten, baleta laran, no tempu udan monu rai bee lori hotu ba para iha tasi.

“Ami hamoos tuir ida-ida nia uma katak sira ne’ebe hela besik valeta bele hamos valeta laran no uma hun sira, maibe estrada publiku ne’e responsabilidade estado nian,” nia hateten.

Nia dehan governu tenke iha planu ne’ebe diak atu halo jestaun ba lixu sira iha rai laran, liu-liu iha sidade Dili, no mobilize komunidade atu halo reflorestasaun ba foho leten sira.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04