Segunda, Maio 17, 2021

Manager Klinika Bairo Pite (KBP), Inacio dos Santos hateten iha fulan Dezembru tinan 2020, sira registu labarik idade tinan lima mai kraik nain 105 mak sofre malnutrisaun, no nain 5 sei baixa hela hodi hetan tratamentu ba rekuperasaun.

Manager Klinika Bairo Pite (KBP), Inacio dos Santos hateten iha fulan Dezembru tinan 2020, sira registu labarik idade tinan lima mai kraik nain 105 mak sofre malnutrisaun.

Nia dehan labarik sira ne’e nain 20 mak sofre malnutrisaun kronika tanba ne’e tenke baixa baixa hodi hetan atendimentu suplementu F100 no F75 atu ajuda rekupera, no restu seluk malnutrisaun moderandu no aguda.

“Tratamentu depende sira tama kategoria malnutrisaun moderadu ita fo edukasaun no akonseilamentu ba familia, liu-liu inan sira atu utiliza aihan ne’ebe iha nutriente ba oan sira nia hahan lorloron. Ba sira ne’ebe kronika tenke baixa iha ne’e atu ita fo sublementu formula F100 no F75 ba sira,” nia hateten iha servisu fatin Bairo Pite, Dili.

Nia dehan, suplementu nutriente planpnuat ne’e hetan apoia husi ministerio da saúde, maibe F100 no F75 ne’e nutrisionista sira mak kahur rasik fo ba pasiente sira durante baixa.

Nia hateten, durante fulan Dezembru laiha labarik ida mak lakon vida tanba malnutrisaun, maibe iha balun ne’ebe sira halo referral ba hospital ho komplikasaun moras seluk.

Nia hatutan, situasaun surtu COVID-19 indireitamente ba iha estado nutrisaun komunidade nian, liu-liu labarik sira idade tinan lima mai kraik. Nia espera ho programa sesta bazika ne’ebe governu implementa bele fasilita populasaun sira labele menus aihan.

Tuir peskiza Aihan no Nutrisaun Timor-Leste tinan 2020, hatudu prevalensia ba malnutrisaun kagetoria stunting ou raes badak iha 47.1%, wasting ou krekas iha 8.6%, no underweight ou todan menus iha 32.1%.

Iha parte seluk, Diretora Ezekutivu Organizasaun Fundasaun Alola, Maria Imaculada Guterres hateten papel sosiedade sivil nian foku liu ba edukasaun no prevensaun nian tanba ne’e kontinua halo edukasaun ba inan aman sira atu tau matan ba oan sira, liu-liu sira ne’ebe tinan lima mai kraik tanba sira vulneravel liu atu hetan moras.

Nia dehan kuidadu saúde oan sira nian laos deit kona ba ijiene pesoal, maibe importante tau matan mos ba estado nutrisaun labarik sira nian, liu-liu hili aihan ne’ebe iha valor nutrisaun adequado.

“Malnutrisaun ne’e komplikadu laos deit nutrisaun, maibe ijiene ladiak halo moras sira mos kontribui hotu entau ami foku ba ida ne’e, liu-liu familia ida-ida iha munisipio Dili tenke iha sintina no uza sintina,” hateten.

Nia hateten, sira involve iha implementasaun programa PAKSI, liu-liu iha Munisipio Dili hodi kontribui ba hadia nutrisaun no redus malnutrisaun ba labarik sira tinan lima mai kraik nian tanba ijiene ladiak no sanitasaun ladiak kontribui mos ba malnutrisaun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04