Segunda, Outubro 26, 2020
Total visitors: 530117

Manager Klinika Bairo Pite (KBP), Inacio do Santos hateten trimestre segundu tinan 2020, klinika registu pasiente malnutrisaun moderanu no grave hamutuk nain 98, maioria labarik tinan lima mai kraik.

Manager Klinika Bairo Pite (KBP), Inacio do Santos hateten trimestre segundu tinan 2020, klinika registu pasiente malnutrisaun moderanu no grave hamutuk nain 98.

Nia salienta, pasiente sira ne’e halo deit tratamentu ambulatoriu, liu-liu simu suplementu nutriente, no aimoruk vitamina hemu iha uma atu ajuda rekupera tanba sentru internamentu iha KBP sei taka.

“Maioria labarik idade tinan lima mai kraik tanba inan sira la tau atensaun ba oan sira. Malnutrisaun akontese laos ita hahan laiha, ita iha ai-han, maibe ita nia konhesimentu atu utiliza hahan ne’ebe riku nutriente mak sei menus loos,” nia hateten iha servisu fatin Bairo Pite, Dili.

Nia haktuir, malnutrisaun a’as iha rai laran fator ida mak espasu inan sira isin rua tanba dala barak inan sira mai oan ne’ebe sofre malnutrisaun seidauk tinan ida, inan gravida fali ona.

Nia hatutan, bainhira inan isin rua fali ona automatikamente hapara susuben ba oan ne’ebe idade sei ki’ik, entau labarik fasil hetan moras no malnutrisaun tanba sira la hetan susuben exclusivu no suplementu nutriente seluk.

Nia dehan, presiza intervensaun ne’ebé multisektoral atu hamenus no kombate malnutrisaun iha Timor-Leste, liu-liu asegura seguransa aihan, kobertura edukasaun promosaun kona-ba susuben esklusivu, planeamentu familiar, no seluk tan.

Nia informa, husi 98 pasiente ne’ebé halo tratamentu suplementu nutriente kuaze pursentu 50 mak hetan rekuperasaun no pursentu 50 seluk sei kontinua tratamentu.

Entertantu, Diretur Servisu Autonomia Medikamentu no Ekipamentu Saúde (SAMES), Santana Martins informa, stok medikamentu multi vitamina no vitamina A no suplementu nutriente F75 no F100 ba tratamentu malnutrisaun disponivel hela iha armajen atu distribui ba fasilidade saúde sira.

“Suplementu nutrisaun hanesan items F75, F100, plumpynut, plump sup ne’ebe ita sosa ho orsamentu governu nian ne’ebe apoia husi Uniaun European oras ne’e tama mai ona iha armajen. Ita hein hela kalendariu distribuisaun,” nia hateten.

Nia haktuir, stok iha hela, maibe ho situasaun agora labele garantia tanba atu asegura stok wainhira iha estabilidade finanseiru.

Iha parte seluk, Presidente Board Rede Feto Timor-Leste, Judite Dias Ximenes hateten malnutrisaun problema nasional ne’ebe komplikadu tanba ne’e presiza komitmentu politika husi governu no espiritu servisu husi entidade hotu atu bele redus malnutrisaun iha rai laran.

“Ohin loron ami hakbesik ba governu atu hatene governu nia hakarak, se kombate malnutrisaun hanesan prioridade ida. Ita sei reforsa governu liu husi membrus atu kapasita no hakbi’it familia sira atu sai husi problema malnutrisaun,” nia hateten.

Nia haktuir sosiedade sivil, liu-liu organizasaun feto sira prontu servisu hamutuk ho governu atu redus malnutrisaun iha rai laran liu husi kapasita no hakbi’it inan feto sira.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04