Atividade konsolidasaun kontinua to’o tama kampana

Maioria Partidu Politiku (Parpol) ne’ebe oras ne’e hala’o hela atividade konsolidasaun iha baze konkorda atu kontinua la’o to’o tama iha kampana elisaun jeral 2012 nian.
“Ha’u hanoin la’o ba bei beik, partidu PSD nian iha distritu hotu hotu sira organiza forma estrutura hodi hametin programa partidu nian,” hateten Deputadu husi bankada Partidu Sosial Demokrata (PSD), Mario Viegas Carascaláo, semana kotuk iha Parlamentu. Tuir eis Vise Primeiru Ministru ne’e katak, wainhira partidu politiku sira forma hotu tiha nia estrutura mak tama ba kampana elisaun presidensial no lejislasaun nian iha 2012.
“Tanba kampana ne’e la hein ita, se mak prontu avansa, no se mak la prontu hela,” nia katak.
Entretantu Deputadu Partidu Demokrasia (PD), Adriano Joáo, hateten konsolidasaun ba partidus politikus hodi hametin nia estrutura sei la para to’o tama kampana.
“Ita nia konsolidasaun sei la’o nafatin to’o kongresu, kongresu hotu tiha sei kontinua to’o eleisaun jeral tinan oin,” nia dehan.
Nia hatutan, maske sira halo konsolidasaun to’o tama kampana maibe iha diferente entre konsolidasaun no kampana. “Kampana ema bele halo pawai iha estrada, enkuantu konsolidasaun sebatas forma estrutura deit, la ba iha estrada halo pawai, hakilar,” nia esplika.
Deklarasaun hanesan mai mos husi bankada Congresu Nasional Rekonstrusaun Timor-leste (CNRT), Deputadu Pedro Martires da Costa, hateten konsolidasaun partidu CNRT sei la’o nafatin to’o tama eleisaun.
“Ita hanesan partidu ita nia baze ita tenke atualizadu, fo programa partidu nian ho vizaun partidu nian ba militantes sira, e lideransa partidu nian iha dever atu haklekar nafatin programa partidu nian ba baze,” katak Deputadu Pedro. “tanba ne’e ami konsolidasaun sei la para to’o tama tempu kampana,” .
Relasiona ho kestaun ne’e, partidu CNRT kontinua halo kontaktu ho sira nia eleitores no militantes sira iha semana-semana hodi hato’o programa partidu nian iha baze.