- Publika iha: 23 Agosto 2011
Membru Parlamentu Nasional husi bankada Opozisaun Fretilin duvida ho planu Governu nian kona-ba atu loke portu foun mina rai nian iha Suai tanba ate agora governu sei nonok hela.
“Hau hanoin agora la biban ona atu halo portu foun tanba atu besik tan udan, fatin mos seidauk identifika, modelu ba portu foun ne’e mos ita seidauk hatene e satan agora atu tama tan ba 2012, partidu hotu prepara aan ba eleisaun jeral tinan oin, ne’ebe agora la realiza ona,” preokupa Deputadu Inacio Moreira semana kotuk iha Parlamentu.
Maske nune’e, komunidade husi distritu Suai sente kontente hoplanu governu ne’e tanba tuir sira bainhira governu realiza duni planu ne’e mak joventude sira iha fatin ne’e sei hetan servisu.
“Ha’u kontenti los se Governu realiza planu ida ne’e tanba bele loke servisu ba ami juventude Suai oan tomak,” joventude Suai Fander Houge kontente.
Tanba ne’e nia parte husu ba governu liu husi Ministeriu Infra-estrutura (MI) atu realiza planu loke portu foun ne’e nune’e joventude iha distritu Suai bele servisu netik. “Se lakohi realiza lalika promete tun-sa’e,” nia dehan.
Entretantu bainhira jornalista koko atu konfirma kestaun ne’e ba iha Ministru Infra-estrutura no Sekretariu Estadu Rekursu Naturais, Pedro Lay no Alfredo Pires maibe lakonsege tanba laiha fatin.