- Publika iha: 23 Agosto 2011
Toilet Publiku (TP) ne’ebe iha area Lesidere nian hetan sobu husi ema deskonesidu tanba governu la tau matan.
“Governu halo tiha toilet ne’e maibe nunka loke ba publiku to’o ema sobu tiha e ida ne’e governu soe osan arbiru deit,” preokupa Bernardino Xavier Freitas,komunidade Lesidere, semana kotuk iha Lesidere,Dili.
Tuir nia, governu tenke halo uluk planu antes harii buat ida, labele fakar deit osan depois la uza. “se hanesan ne’e diak liu osan ne’e hodi uza ba buat ne’ebe iha valor,”nia dehan.
Enkuantu Jacinto Gusmao, negosiante roda 2 hateten, toilet ne’e halo kleur ona besik tinan rua ona maibe to’o agora seidauk loke e to’o ema estraga tiha deit.
“ami hakarak hateten deit katak, toilet ne’e halo para ema atu uza ga oinsa ,se la uza diak liu sobu tiha deit,”Jacinto dehan.
Nia hatutan durante ne’e bainhira ema sira atu soe bee maibe ladiak tanba odomata toilet ne’e taka metin.”Entaun sobu tiha deit,”.
Entretantu tuir observasaun jornalista iha fatin ne’e nota katak odomatan toilet publiku ne’e ema baku rahun tiha depois sira tama ba soe bee iha laran, te, mi no sintina kuak fatuk nakonu.
Wainhira jornalista koko konfirma asuntu ne’e ba iha Admistrasaun Distritu Dili nian maibe la konsege tanba Administrador Ruben Braz la iha fatin.