Borges: Parpol sira la tuir komprimisiu

Membru Parlamentu Nasional husi bankada Partidu Unidade Nasional (PUN), Fernanda Borges hateten Partidu Politiku (parpol) barak mak latuir sira nia komprimisiu ba povu bainhira kaer ukun.
“Sira bosok deit povu, iha kampana sira promote buat barak maibe depois de sira manan no ukun, promesas hirak ne’e la halo tuir,” hateten Deputada Fernanda Borges, semana kotuk iha Parlamentu Nasional. Borges hato’o kestaun ne’e relasiona ho parpol balun bainhira halo kampana halo promesas barak ba povu maibe la kumpri sira nia komprimisiu.
“Agora besik tan ona eleisaun e la kleur tan partidu sira halo kampana, promesa buat barak tan, uluk sira promesa katak bainhira sira manan, povu sei uza ahi eletrisidade ho gratuita maibe relaidade povu sosa pulsa mak foin hetan ahi e pior liutan maske povu sosa tiha pulsa maibe ahi kontinua mate-lakan, ne’ebe agora lalika tan promote,”nia dehan.
“Partidu politikus sira bosok deit povu e koalia mangame deit,”.
Tanba ne’e nia husu ba partidu sira ne’ebe promote ba povu iha tempu kampana tenke hatan ba povu.
Entretantu Deputadu Faustino dos Santos alias Renan Selak, rekonese katak iha partidu balun ne’ebe hamutuk iha Aliansa Maioria Parlamentar promote duni maibe nia labele realize komprimisiu ne’e tanba halo aliansa.
“Hau hanoin povu mak tenke kumpriende agora ne’e tanba partidu lima mak ukun ne’ebe nia labele implementa komprimisu ne’e ba povu,” nia dehan.
Tuir Renan, iha kampana agora, partidu UNDERTIM sei halo komprimisiu ba povu katak se karik “ami nia partidu manan iha eleisaun 2012, eletrisidade sei gratis ba ema ne’ebe kbiit laiha atu selu,”nia dehan.
Iha parte seluk komunidade Colmera, Bonifaçio da Costa, hateten partidu politiku sira bainhira halo kampana halo promesas barak ba povu maibe depois de ukun sira la kumpri sira nia promesa.
“Iha kampana sira promete katak, ami manan iha eleisaun eletrisidade sei tama to’o ida-idak nia uma, uza gratis deit maibe agora eletrisidade ami selu e ahi mos mate nafatin hela deit, se hanesan ne’e lalika halo promesa, tanba povu buat ne’ebe realidade,” nia hateten.